Lideri i opozitës Lulzim Basha e ka nisur krejt ndryshe fjalën e tij sot për mediat.
Në një fjalim që përmendte disa angazhime ndaj qytetarëve, Basha tha në fund se këto ishin premtime të kryeministrit Edi Rama disa vite më parë.
Kryedemokrati tha se Rama nuk ka mbajtur asnjë premtim deri më tani dhe se ka dështuar në çdo drejtim.
“Qytetarë të Shqipërisë,
Më dëgjoni me vëmendje
1) 300 mijë vende punë
-Ne kemi ardhur këtu për të vendosur me votë tek numri 29 çlirimin e energjive të jashtëzakonshme të këtij populli dhe për të luftuar së bashku që të hapim 300 mijë vende të reja pune.
2) Shëndetësi Falas
Shërbim shëndetësor falas brenda 4 viteve të para të qeverisjes sonë
3) Heqja e TVSH-së për ushqimet bazë
“Heqja e TVSH-së mbi bukën, qumështin dhe vezët, si edhe ulja e TVSH-së mbi ushqimin, janë e vetmja rrugë për t’u ardhur sadopak në ndihmë sot”
Do të ulim taksat për 97 përqind të shqiptarëve.
4) ULJA E ÇMIMIT TE ENERGJISE ELEKTRIKE
-Do të ulim taksën për faturën e energjisë për familjarët.
5) Negociatat me Bashkimin Europian
Do t’i hapim negociatat me Bashkimin Europian, ne do ta bëjmë Shqipërinë anëtare të Bashkimit Europian.
6) Uljen e Borxhit publik
-Do ta përcaktojmë me ligj masën e borxhit, të mos lejojmë një borxh pa asnjë tavan ligjor.
– Defiçit dhe borxh publik nën kontroll, përmes politikash të përgjegjshme fiskale.
7) Buxhetin për arsimin 5%
-Arsimi, angazhimi ynë, burimet financiare nuk do të jenë më pak se 5% e Prodhimit të Brendshëm Bruto
8) Legalizime falas + Ujin në çdo parcelë e shtëpi
Dy gjëra, këto 4 vite, do merrem unë personalisht dhe do të përgjigjem unë personalisht. Mbas 4 vitesh nuk do t’ja vë absolutisht përgjegjësinë askujt:
Legalizimet falas të shtëpive të ndërtuara në zonat informale dhe ujin në çdo metër katror tokë buke dhe ujin e pijshëm në çdo shtëpi. Me këto dy gjëra do merrem unë dhe do përgjigjem unë.
9) Kthimi i emigrantëve në vend
Ne do të ndërtojmë mirëqenie dhe do të krijojmë kushtet që dhe bijtë tuaj të kthehen nga andej nga janë. Mos rropaten më në tokat e fqinjëve, po të vijnë dhe të ndërtojnë të ardhmen dhe pasurinë e tyre këtu në tokat e stërgjyshërve të tyre.
A ju duken se i keni dëgjuar këto më parë? Keni të drejtë. Pikërisht këto ishin premtimet e Ramës para 8 viteve.
Po Rama nuk ka mbajtur as edhe një nga këto premtime. Ai ka dështuar në çdo drejtim”, deklaroi kreu i PD.
Ai tha se Rama premtoi para 8 vjetësh kujdes shëndetësor falas për të gjithë, por e nuk bëri dhe shëndetësia është në kolaps. Basha theksoi se ka ardhur koha ta largojmë Ramën dhe të punojmë për njerëzit.
“Rama premtoi para 4 vjetësh se do të ulte kostot e jetesës, po kostot e jetesës vetëm rriten. Tani ka filluar të thotë të tjera premtime boshe.
E gjithë kjo do të ishte për të qeshur sikur këto tallje të mos rëndonin mbi xhepat e shqiptarëve dhe të mos i vuanim në kurriz tash 8 vjet. Ka ardhur koha të ndryshojmë, ka ardhur koha ta largojmë Ramën dhe të punojmë për njerëzit.
Prej disa muajsh, unë po punoj me specialistët më të mirë për të sjellë plane serioze pune për qytetarët shqiptarë, në të gjitha fushat: ekonomi, arsim, shëndetësi, bujqësi, dhe në të gjitha fushat!”, u shpreh kreu i PD
Basha numëroi problemet që ka sot vendi teksa, sipas tij ka vetëm propagandë nga qeveria.
“Vendi ynë është nën ujë. Sërish.
Rrugët janë bllokuar. Sërish.
Njerëzit po jetojnë në çadra. Ende.
Gra e fëmijë po vuajnë të ftohtin.
Katastrofa natyrore kanë ndodhur këto kohë dhe gjithmonë do të ndodhin.
Pyetja e vetme që shtrohet është: ç’po bëhet për të shmangur sa më shpejt e sa më mirë pasojat që i vuajnë qytetarët?
Çfarë bën Edi Rama sa herë njerëzit kanë nevojë për ndihmën e shtetit?
Vetëm propagandë!
Çfarë bëri Rama pasi ra tërmeti? Vetëm propagandë!
Çfarë bëri Eama kur nisi pandemia? Vetëm propagandë!
Çfarë bëri pasi nisën përmbytjet? Vetëm propagandë!
Ku është Rama ku shumica e vendit është e bllokuar?
Rama po bën atë që di të bëjë më mirë: vetëm propagandë!
Me Ramën Shqipëria ka ngecur në baltë, dhe ka ardhur koha që ta nxjerrim atë nga balta. Më 25 prill Rama do të humbë dhe do të fitojë Shqipëria!”, tha ai.
