Ministrja Ogerta Manastirliu dhe Komitetit Teknik i Ekspertëve këtë të mërkurë në një konferencë për mediat kanë analizuar situatën e pandemisë dhe masat e reja anti-covid19.
Manastirliu u shpreh se ka dyshime të arsyeshme se kemi një qarkullim të mutacioneve të reja të virusit Covid-19.
Manastirliu theksoi se është vendosur që shkollat e mesme në qarqet kryesore ku ka shkallë të lartë infeksioni do të vijojnë mësim online nga data 11 deri në 25 shkurt ndërsa ndalohet qarkullimi i lëvizjes për qytetarët nga ora 20:00 e mbrëmjes – 6:00 të mëngjesit, me përjashtim të emergjencave shëndetësore dhe për arsye pune (në këtë rast është e domosdoshme leja nëpërmjet aplikimit tek e-Albania) për një afat 14 ditor, duke filluar nga dita e enjte, datë 11 Shkurt – 25 Shkurt.
Pjesë nga Deklarata e Ogerta Manastirliut:
Jemi sot në një moment sa delikat, aq edhe të rëndësishëm. Ka dyshime të arsyeshme se kemi një qarkullim të mutacioneve të reja të virusit Covid-19. Jemi në një situatë ku me gjasë prej këtyre varianteve të reja kemi shtim të infeksioneve. Kushtet e dimrit e bëjnë edhe më të pafavorshme situatën. Kemi shtim të infektimeve, ulje të moshës së të prekurve. Kjo ka sjellë një shtim të ndjeshëm të misioneve të urgjencës kombëtare, misioneve në banesë. Kjo situatë në ditët e fundit është shoqëruar edhe me shtim të rasteve në spitale dhe rritje të pacientëve në terapi intensive.
Komiteti i Ekspertëve ka vlerësuar situatën dhe mbi bazën e një analize shumëplanëshe, ka vendosur ditën e sotme këto masa: ndalimi i qarkullimit nga ora 20:00 deri në orën 06:00 të mëngjesit, me përjashtim të urgjenca dhe punës. Kjo do të jetë për një periudhë 14 ditore. Kjo masë do të nisë nga dita e enjte.
Shkollat e mesme në zonat e riskut të lartë, Tiranë, Fier, Vlorë, Berat, Durrës, Gjirokastër, lezhë, Lushnje, Pogradec dhe Kamëz do të aplikojnë mësimin online.
