Shqiptarët vidhi, ofendoi, shtypi, ndrydhi, leckosi, prangosi, trajtoi si të pa denjë, i pranojnë të gjitha. I fusin dhe një “hajt se jemi mësuar ne” dhe vijojnë të jetojnë në torturë. Ama shqiptarët po i pe shtrembër, po i kritikove, këshillove, po ju dole kundër në bindje politike dhe po ju injorove komentet për emisionet televizive, i ke hapur vetes punë.
Ky është populli im! Një vend përrallor me njerëz që nuk ja dinë vlerat, kërkojnë ta braktisin dhe politikanë që vetëm e vjedhin dhe e cungojnë. As përgjimet e antimafias, as deti i falur, as rrogat qesharake, as papunësia, as shëndetësia në kolaps nuk i shqetëson shqiptarët e mi sa treshja “Tea-Andi-Beart”! Vetëvetiu më lind pyetja: – A jeni të çmendur?! Emisionet televizive janë një zgjedhje, jo detyrim, siç është dhe duhet të jetë mirëqenia juaj. Keni vjellë vrerin e jetës për diçka që nuk ju hy në xhep fare fundja. Ata bëjnë show, përfitojnë ndjekës dhe famë, ndërsa ju ankoheni se ju kanë hedhur hi syve.
Fitojnë miliona nga klikimet tuaja, rregullojnë jetën e tyre dhe të familjarëve, ju çfarë bëtë?! Harxhaut atë 200 lekësh në kafene, për ti komentuar!!! Keni 20 vjet në demokraci dhe i keni mbyllur të dy sytë ndaj skamjes e injorancës që ju janë ulur këmbëkryq dhe për një emision televiziv jeni gati të ngrieheni në protestë?
Ah mor populli im, sa më dhimbseni! Por nëse jemi në këtë gjendje, është faji juaj pasi i jepni rëndësi të pa rëndësishmes dhe neglizhoni jetiken. Mos pretendoni të na dojë as Europa dhe as bota, do t’qeshnin me ne…. Mjaft ju dhatë rëndësi shembujve negativë, mjaft qëndruat në toksicitet duke sharë me libër shtëpie njerëz të cilët as nuk ju konsiderojnë në jetën e tyre. Mjaft përkrahët dhunën, bullizmin.
Shqiptar mos rri po çohu shqiptar! Po të vjedhin bukën, jetën, lirinë, nderin, tokën dhe ekzistencën. Nëse këto nuk ju bëjnë përshtypje dhe nuk janë arsye revolte atëherë me gjithë keqardhjen, e meritoni gjithçka po ju bëhet!…./InfoPressAlbania ( E.D)
