Ish-mjeku i Urgjencës Ilir Allkja, që u shkarkua nga puna më 30 dhjetor, ka folur sot në emisionin “Zonë e Lirë” lidhur me prapaskenat e vendimit të QSUT. Mjeku tha se do të ndjekë të gjitha rrugët gjyqësore në Shqipëri dhe do ta dërgojë çështjen në gjykatat ndërkombëtare. “E fundit është që unë do të largohem nga ky vend”, tha Allkja.
Lidhur me arsyet e shkarkimit ai shprehet: “Aty përshkruheshin disa arsye. Ishte dezinformim publiku, nxjerrje e informacioneve konfidenciale, dhe sulm ndaj QSUT. Unë për drejtorin e spitalit kam bërë një thirrje, pasi lidershipi i tij ka çeduar nga fillimi i pandemisë.
S’kam parë asnjë qasje të tij me stafet mjekësore. Unë kam besuar në lirinë time dhe të drejtat e mia. Kam dashur të besoj se jetoj në një vend normal. Roli i intelektualit është të kritikojë sistemin, madje t’i kundërvihet sistemit. Në të gjithë shkrimet e mia kam kërkuar të ketë më shumë përgjegjshmëri. S’kam kërkuar masazh në orar të punës, kafe në orar të punës”.
Duke folur mbi deklaratat e kryeministrit Edi Rama ndaj tij, Allkja shprehet se: “Është e paprecedentë që një kryeministër të dalë publikisht për një mjek. Unë thoja qartë që në tre raste kam qenë pa uniformë. Në atë video-mesazh këtë thoja kam qenë në tre raste të dyshuara me Covid pa uniformën speciale”.
“Unë prandaj jam dënuar që të mos flasin të tjerët. Jetojmë në një kohë që mjekët në Shqipëri trajtohen si mall, dhe numri i tyre në raport me banorët është në nivelet e vendeve afrikaneve’, theksoi ai.
Sjellim në vëmendje që ai u shkarkua nga drejtori Enkelejd Joti me arsyetimin se kishte shkelur etikën në punë duke publikuar materiale konfidenciale përmes komunikimeve të tij në rrjetet sociale dhe media.
