Ish-deputeti Eduart Ndocaj, përmes urimit tradicional për Krishtlindje, ka uruar të gjithë shqiptarët, pa dallim feje, për më shumë begati dhe paqe në këtë kremtim, i cili vjen në një kohë të pazakontë, pasi pandemia e Covid-19, e vuri njeriun në sprova të vështira, por me besimin në fuqinë e Krijuesit ne do mund ta mposhtim të keqen dhe ti gëzohemi sërish jetës.
Në urimin e tij, Ndocaj është ndalur në mesazhin e kësaj feste, duke na ftuar të jemi besimplotë dhe të bindur se bashkërisht do ia dalim kësaj të keqeje, pasi në vazhdimësi kemi kapërcyer sfida të njëpasnjëshme, duke dëshmuar se në emër të jetës, jemi të pathyeshëm dhe solidë në vlerat dhe parimet themelore.
Të dashur bashkatdhetarët e mi!
Më lejoni që në emrin tim t’u përcjell urimet e mia më të përzemërta pë këtë festë të madhe të mbarënjerëzimit!Sot kremtojmë Lindjen e Birit të Perëndësisë, që erdhi si dashuri e Krijuesit për vazhdimësinë e jetës, duke qenë kështu mesazhi më kuptimplotë dhe më domëthënës për realitetin në të cilin ndodhemi dhe për të cilin kemi nevojë më shumë se kurrë.
Kremtimi i kësaj feste, në një situatë të vështirë, ku pandemia Covid-19, e vuri njeriun në sprova të vështira, është adresimi i duhur për më shumë besim në fuqinë e bashkimit dhe në tejkalimin e ndasive që vijnë nga botëkuptime që zbehin vlerën e jetës.
Me lajtmotivin e këtij mesazhi, le të jemi besimplotë se bashkërisht do ia dalim, pasi në vazhdimësi kemi kapërcyer sfida të njëpasnjëshme, duke dëshmuar se në emër të jetës, jemi të pathyeshëm dhe solidë në vlerat dhe parimet themelore.
Me urimin tim më të përzemërt për JU dhe familjet Tuaja, dëshiroj që Krishtlindja të sjellë te Ju dhe familjarët tuaj, paqen dhe qetësinë e duhur, të trazuar aq shumë gjatë këtij viti të vështirë!
Qofshi mirë me shëndet dhe paçi mirësinë dhe bekimin e Lindjes së Krishtit, që erdhi si ndriçim në jetët tona! Krishtlindje të mbara dhe të begata për të gjithë JU, kudo ndodheni!
Përzemërsisht,
Eduart Ndocaj
