Mediat në Kosovë, raportojnë se Gjykata Kushtetuese ka marrë vendimin lidhur me votën e deputetit Etem Arifi, e cila solli konstituimin e qeverisë Hoti. Gjykata ka vendosur se kjo votë nuk është legjitime, ndaj kjo pritet të sjellë rrëzimin e qeverisë dhe zgjedhje brenda 40 ditëve.
Gjykata Kushtetuese, e mori në shqyrtim këtë çështje, pas ankimit të Lëvizjes Vetëvendosje.
Qeveria Hoti u formua, pas rrëzimit në Kuvend të qeverisë së Albin Kurtit, me anë të një mocioni të mosbesimit.
Sipas Vetëvendosjes, deputeti Arifi, nuk mund të votonte për qeverinë, pasi ai kishte qenë i dënuar.
Lidhur me ankesën e Lëvizjes Vetëvendosje për votën e Etem Arifit, Gjykata Kushtetuese kishte mbajtur një seancë dëgjimore publike, ku kishte marrë pikëpamjet e të gjitha palëve lidhur me votën e deputetit Arifi.
Nga Qeveria, insistonin se vota e Arifit ka qenë legjitime, derisa përfqësuesi i VV’së, zëshëm thoshte se Arifi s’ka pasur legjitimitet në momentin kur ka votuar.
Deputeti Arifi është dënuar me 1 vit e 3 muaj burgim nga Gjykata e Apelit për mashtrim me subvencione. Ndonëse i dënuar, Arifi kishte votuar pro formimit të qeverisë Hoti në seancën e 3 qershorit.
