Nga Dona Vuksanlekaj
Që kemi parë shumë ngjarje për një vend kaq të vogël sa Shqipëria është absolutisht e pamohueshme, por ngjarja e 8 dhjetorit 2020 kalon çdo limit të mundshëm.
Një 25-vjeçar që vritet disa metra larg shtëpisë së tij, pse kishte thyer karantinën. Analiza e kësaj ngjarjeje të rëndë nuk mbetet vetëm te ministri Lleshaj, por te Edi Rama, që për 7 vite dërrmoi ekonominë, popullsinë, iu mori njerëzve lirinë, shpresën, të ardhmen e deri edhe jetën.
Eshte ky kryeministër që ia beson Shqipërinë llojit të vet dhe pastaj vjen ministri Lleshaj që bëri pjesë të Policisë së Shtetit persona që deri atë ditë rrinin nëpër kafet e lagjes njerëz pa arsim dhe integritet moral.
Është korrupsioni, amoraliteti dhe mungesa e theksuar e drejtësisë në qeverinë shqiptare ajo që çon në tragjedi të tilla.
Strategjia që po ndjek kryeministri dhe shërbëtorët e tij për këtë ngjarje është paralelizimi i vrasjes së 25-vjeçarit me vrasjet e 21 janarit. Paralelisht me gjithë këtë dhunë dhe kaos që këta po i bëjnë Shqipërisë, ndërmarrin edhe ndryshimin e Kodit Penal duke rritur kështu dënimin për këdo që kundërshton policinë.
Sikur të mos mjaftonte e gjithë kjo, supozohet edhe se dënimi ndaj policit që qëlloi mbi 25-vjeçarin pritet të jetë deri në 7 vite burg, ndërkohë që sikur Klodiani vetëm të ishte plagosur, e sigurtë që dënimi për të me akuzën e mosbindjes ndaj policisë do të ishte po deri në 7 vite.
Nuk ka asgjë që e zhbën një ngjarje të tillë dhe që i kthen jetën Klodianit, por solidarizimi i gjithë shqiptarëve sot mund të thuhet me plot bindje është një hap premtues drejt një të ardhmeje të bashkuar dhe të fuqizuar për të mbrojtur lirinë dhe të drejtat tona.
Ashtu siç ndodhi sot me të drejtën e gjithë botës le të ndodhë nesër e çdo ditë derisa kjo bandë kriminale të marrë fund.
Ju drejtohem të gjithë votuesve të Shqipërisë që në ditën e votimeve të reflektojnë përpara se të hedhin të zezën mbi të bardhë dhe të kujtojnë dhimbjen që shkaktoi vrasja e një të pafajshmi. Të mendojnë për fëmijët që i njëjti rrezik të mos iu kanoset edhe atyre e ëndrrat t’u priten në mes!
*Autorja është studente në Bruksel
