Parlamenti miratoi të hënën ndryshimet në Kodin Zgjedhor, duke ndaluar koalicionet parazgjedhore, ashtu sikundër kishte paralajmëruar prej disa javësh Kryeministri Edi Rama. Pro projektit të paraqitur prej tij votuan edhe disa deputetë të të ashtëquajturës “opozita” parlamentare, duke i garantuar ato që konsiderohen si votat Kushtetuese, për miratimin e draftit.
Ndërkohë sot, kreu demokrat ka thirrur në një takim drejtues dhe përfaqësues të partive opozitare, ku mësohet se është diskutuar mbi strategjinë që do të ndjekë opozita e bashkuar.
Nga drejtues të partive të vogla, mësohet se në takim janë diskutuar opsionet lidhur me përfaqësimin opozitar në zgjedhjet e 25 prillit, nga ku me shumë gjasa do të aplikohet skema me dy koalicione, përkatësisht të drejtuara nga PD dhe LSI.
Burime shprehen se opsioni për një listë unike, pra ku të përfshihen të gjitha subjektet, është i përjashtuar, ndërkohë që gjithçka duket se do të kalojë përmes kalkulimeve lidhur me maksimalizimin e votës.
Basha deklaroi para gazetarëve se shqiptarët e kanë marrë tashmë vendimin dhe nuk ka asnjë formulë që mund të shpëtojë Edi Ramën nga humbja.
“Vendimin e kemi marrë tashmë bashkë me shqiptarët. S’ka formula që ta shpëtojnë Ramën, vetëm po ndërroi të gjithë votuesit me Kushtetutë”, tha Basha.
