Ministria e Shëndetësisë së Kosovës u ka bërë thirrje qytetarëve që të mos bien pre e publikimeve të rreme, ku po prezantohen “receta” të ndryshme për trajtimin e personave me COVID-19, sëmundje që shkakton koronavirusi.
Gjatë ditës së diel, në rrjetet sociale janë shpërndarë “receta” të ndryshme lidhur me trajtimin mjekësor në shtëpi kundër COVID-19 dhe me medikamentet që duhet të kishin në shtëpitë e tyre qytetarët.
“Duke qenë që ‘recetat’ e tilla provokojnë edhe reagime të ndryshme dhe ngjallin edhe shqetësime, ju lusim që të mos bini pre e publikimeve të tilla dhe për çfarë do shqetësimi lidhur me COVID-19 të kontaktoni mjekun tuaj më të afërt dhe të përcillni vetëm këshillat zyrtare, të cilat publikohen nga Ministria e Shëndetësisë, IKSHPK, profesionistët kompetentë shëndetësorë dhe institucionet kredibile dhe të konfirmuara”, thuhet në reagimin e MSH-së.
Aktualisht, në botë nuk është zbuluar ende një vaksinë kundër koronavirusit të ri, ndonëse përpjekje për një gjë të tillë po bëjnë shumë shtete dhe kompani në mbarë botën.
