Shpërblimi më i madh për një prind është të ketë rritur fëmijë të denjë për shoqërinë. E një prind i tillë është babai i një prej themeluesve (Luard Mehmetaj) të televizionit të parë të Istogut.
Shaqir Mehmetaj është një figurë mjaft e njohur dhe e dashur, nga fshati Zabllaq i Komunës së Istogut. Sot feston 80 vjetorin e tij të lindjes. Kalvari i jetës së tij ka qenë i gjatë dhe i mundimshëm. Ka punuar 30 vite në Austri, por fëmijët i ka lënë në Kosovë për tu shkolluar dhe për të mos i larguar nga vendi për arsye të asimilimit.
Një tjetër arsye ishte dhe ndjenja e madhe e atdhedashurisë. Ndonëse vetë e mori rrugën e gjatë e të mundimshme të emigrimit, fëmijët nuk donte kurrsesi ti largonte nga vendlindja.Shaqiri është babai i 5 fëmijëve, 3 djemve dhe dy vajzave, Agushi, Luani, Luardi, Aida dhe Saibe. Gjithashtu është gjyshi i plot 13 nipërve dhe mbesave. Me to e ka shpirtin të mbushur dhe është i lumtur që sakrificat e tij janë shpërblyer.
Me të gjithë dashurinë që i falin ai ndihet i bekuar çdo ditë.Sakrificat e tij për vite me radhë, nuk ishin të kota. Ashtu si ai dëshironte, fëmijët e tij kanë ecur përpara dhe janë arsimuar në profesione të ndryshme duke i shërbyer vendit të tyre që i rriti dhe i edukoi me ndjenjën e lirisë dhe të atdhedashurisë.Sa i lumtur ndihet Shaqiri për këtë fakt.
Ka patur një jetë aktive por të shëndetshme, pasi në krah i ka ndejtur një bashkëshorte e denjë si Ajshja, e cila me “petkun” e burrneshave ka dëshmuar se është një krah i fuqishëm për të përballuar jetesën e vështirë, sidomos në ato vite. Si nga ana ekonomike, aq dhe nga okupimi serb që i mbante të survejuar dhe i privonte nga liritë dhe të drejtat e tyre. Ajo bëri rolin e nënës dhe të babait gjatë viteve kur Shaqiri ishte në emigrim.Sot ai ndihet një baba dhe gjysh i lumtur dhe kënaqësinë më të madhe ja fal koha që kalon me fëmijët, nipërit dhe mbesat!
Këto janë frytet e jetës të një njeriu që veç dashurisë për familjen nuk hodhi në asnjë moment poshtë as dashurinë për atdheun.Me plot 80-vite mbi supe, Shaqiri nuk e ka ndërmend të dorëzohet pasi po shijon ditët më të bukura të jetës së tij, po shijon pjalmin e jetës!
