Partia Demokratike ka sulmuar sërish qeverinë e kryeministrit Edi Rama për paketat ndihmëse për personat e mbetur pa punë nga pandemia dhe biznesin e vogël.
Në një deklaratë për shtyp, ish deputetja Tabaku akuzon qeverinë se ka akorduar një shumë të vogël për biznesin e vogël dhe që mbi 250 mijë punonjës dhe të vetëpunësuar nuk po marrin të ashtuquajturën “pagë e luftës”.
“Qeveria po gënjen çdo ditë për ndihmën ndaj biznesit, kur e vërteta është që biznesi nuk sheh asnjë lek në llogarinë e tij. Ato fonde të pakta të vendosura për situatën e krijuar nga virusi nuk po shpërndahen nga qeveria. Sipas të dhënave të thesarit (që mund të gjenden në faqen e open data) qeveria ka disburusar VETËM 10.88 mln euro nga paketat e saj për biznesin e vogël.
Kjo do të thotë që mbi 250 mijë punonjës dhe të vetëpunësuar nuk po marrin pagat e tyre. Biznese që falimentojnë nuk po e marrin ndihmën financiare, familje pa të ardhura nuk po marrin asnjë lekë për të mbijetuar”, u shpreh mes të tjerash Tabaku.
