David Lega, anëtar i Komisionit të Jashtëm të Parlamentit Europian, ka paralajmëruar se nëse paketa ligjore e qeverisë që censuron lirinë e medias kalon në parlament, Shqipëria rrezikon të ardhmen europiane të vendit.
Sipas Legas, Shqipëria rrezikon kryesimin e OSBE-së, që mori para pak ditësh si edhe ecurinë në procesin e integrimit në familjen evropiane.
“Nëse Parlamenti shqiptar miraton ligjet e reja për median, ai vë në rrezik kryesimin nga Shqipëria të OSBE-së. Gjithashtu, ky vendim do të komplikojë negociatat për anëtarësimin në Bashkimin Europian. Për këtë arsye, rezistenca e fortë nga Partia Demokratike është e mirëpritur”, shkruan ai në një postim në Twitter.
Paketa ligjore ka hasur kundërshti nga gazetarët, opozita, OSBE, organizata të medias në vend, por edhe të huaja, ndërsa Komisioni i Ligjeve e ka miratuar këtë të hënë në parim.
Paketa pritet të kalojë për votim në parlament në seancën e 19 Dhjetorit.
