Ekspertja e inxhinierisë së Ndërtimit, Prof. Dr Luljeta Bozo, e ftuar në News 24, është shprehur se janë bërë gabime edhe në ndërtime.
Ajo tregoi edhe se cilat janë zonat më problematike dhe më të rrezikuara në Tiranë:
“Janë disa gabime. Për të ndërtuar mund të ndërtosh ku të duash, por studimet sizmologjike rekomandojnë që për shembull një truall që është i dobët ka rrezik më të lartë se një truall në kodër. Zonat kënetore dhe zonat me pluhur ose nivel të lartë të ujërave nëntokësorë janë më të rrezikshme.
Ata godina që janë shembur ishin afër kënatave ose zonat si ajo e Urës së Dajlanit, ku ka shumë depozitime të rrezikshme. Edhe shtesat e kateve duhet bërë me anë të llogaritjeve që bëhen nga inxhinierë ndërtimi e jo nga njerëzit vetë. Ka rregulla edhe për kolonat. Shpesh ne nuk i respektojmë fare këto rregulla”, u shpreh inxhinierja.
Por si shpjegohet që tërmeti i fundit shkaktoi dëme të konsiderueshme në banesa dhe në pallatet Tiranës, Durrësit dhe Thumanës?
“E ka fajin terreni dhe ndërtimi. Ku është terreni i dobët, duhet pasur shumë kujdes. Në kombinat ka qenë kënetë. Zona ku kalon lumi Lana dhe depozitimi i Lanës janë depozitime të dobëta. Zona më e dobët në Tiranë është Kombinati. Kjo është zona që duhet të ndërtosh jo godina shumëkatëshe, në mënyrë që katet e larta mos të hyjnë në rezonancë me periodën e lëkundjeve të truallit. Problemi është që mos të rrëzohet e gjithë e godina. Duhet të vendosen disa rregulla strikte.
Rindërtimi i ri duhet të bëhet me mend në kokë. Duhet të futet i pari planifikuesi, së bashku me urbanistin. Të përcaktojnë distancat mes objekteve. Ka disa distanca që duhen respektuar. Duhet pasur parasysh distanca nga deti.
E dyta: Puna e arkitektëve. Arkitekti është krijuesi i veprës. Ai ka një sens inxhinierik. Po se pati duhet të bashkëpunojë me inxhinierin. Arkitekti është artist, s’ka problem, le t’i bëjë edhe me forma. Puna e zbatuesit” muret ndarëse duhet të lidhen me kolonat dhe të kenë breza horizontale. Nuk janë respektuar rregullat e zbatimit. Për të gjithë këto procese duhet të këtë kontroll, duhet një instancë që të kryej kontrolle. Për ndërtimet duhet të bëhen studime gjeologjike, jo studime që bëhen nga zyra, por me kontrolle në terren”, tha ajo.
