Vedat Muriqi e ka pranuar se në të kaluarën mund t’i bashkohej ekipit U-21 të Turqisë.
Por, në fund sulmuesi prizrenas mori ofertë nga Përfaqësuesja A e Kosovës dhe e pranoi atë, duke hequr dorë nga turqit.
Sulmuesi shtatlartë kishte marrë ofertë në atë kohë për të luajtur për ekipin U-21 të Turqisë, pasi atë e kishte ftuar trajneri i atëhershëm i atij ekipi, Abdullah Ercan.
Por, në fund sulmuesi i Fenerbahçes kishte marrë ofertë nga Përfaqësuesja A e Kosovës, të cilën natyrisht se nuk mund ta refuzonte.
“Unë isha duke u ndjekur nga Turqia, por jo nga ekipi A. Bëhet fjalë për ekipin U-21 të Turqisë, pasi mua më donte trajneri Abdullah Ercan. Dokumentacioni ishte duke u procesuar, por më pas më erdhi oferta nga ekipi Përfaqësues A i Kosovës dhe shkova për të luajtur për vendin tim”, ka thënë Muriqi për mediat turke.
Ditë më parë mediat e Turqisë shkruan se Muriqi ishte në opsion të Turqisë para se ta zgjidhte Kosovën.
Natyrisht, 25 vjeçari e bëri zgjedhjen e duhur pasi tashmë është bërë yll i “Dardanëve”.
Ai realizoi tre gola për Kosovën vetëm në periudhën shtator-tetor, kundër Republikës Çeke, Anglisë dhe Malit të Zi.
