Leo Messi ditën e sotme mori të gjashtën “Këpucë të Artë” në karrierë, një çmim që e vlerëson argjentinasin si golashënuesin më të mirë evropian në sezonin e kaluar.
Dhënia e trofeut u organizua sot në Barcelonë, ndërsa kapiteni i katalanas shoqërohej nga bashkëshortja, Antonela, dy fëmijët e tij, Thiago dhe Mateo. Gjithashtu prezent ishin dhe dy shokët e skuadrës, Luis Suarez dhe Jordi Alba.
Sakaq, gjatë fjalës së tij në momentin e ceremonisë, ‘pleshti’ u shpreh se Champions League është e veçantë, por La Liga është më e rëndësishmja.
“ Faleminderit ju që jeni këtu prezent. Familja ime veçanërisht. Këtu është edhe Jordi dhe Luis, të dy shumë të rëndësishëm që unë jam këtu. Pa shokët e skuadrës nuk do të mund të fitoja asnjë, i jam mirënjohës të gjithëve.
Champions? Sigurisht Champions është diçka speciale dhe kërkojmë ta fitojmë në çdo vit por La Liga është më e rëndësishme, është ajo që të bën mirë më pas në Ligën e Kampionëve dhe në Kupë. Edhe pse flasim për Champions, asnjëherë nuk harrojmë kampionatin dhe Kupën. Te Barcelona gjithnjë synojmë t’i fitojmë të gjitha”, u shpreh Mesi.
