Lideri i opozitës, Lulzim Basha tha se, ka pasur kontakte me autoritet në Uashington përpara se Ambasada e SHBA të vlerësonte pjesëmarrjen e opozitës në tryezën e thirrur nga OSBE për reformën zgjedhore.
Basha tha se është në komunikime të vazhdueshme me autoritetet dhe zyrtarët amerikanë, duke theksuar se opozita shqiptare është në rrugë të mbarë.
“Edi Rama nuk ndahet dot nga krimi, Vangjush Dako dhe Tom Doshi.
Farsa e dënimit të Saimir Tahirit pa asnjë ditë në burg, kur u provua se gjatë kohës që ishte ministër i Brendshëm, Shqipëria u kthye në hambarin e drogës, tregon se s’kemi të bëjmë me një presion apo blerje të gjyqtarit, por me frikën se hetimi dhe gjykimi i kësaj çështjeje deri në fund do të çonte në zbulimin e autorit të vërtetë të kanabizimit të vendit, që është Edi Rama.
Është një moment kyç për Shqipërinë, pavarësisht se kemi bërë hapa prapa, por kemi një vetëdijësim të faktorit ndërkombvëtar se kështu nuk mund të vazhdohet më, por te PD dhe opozitën e shohin jo thjesht si një faktor, por si një alternativë për nxjerrjen e vendit nga kriza”, tha Basha.
Ai shtoi se kreu i PD-së dhe opozita shqiptare nuk kanë rriskuar asnjëherë për t’u konsideruar si organizata terroriste.
Basha tha se ajo që shikoni sot në raport me ndërkombëtarët është rezultat i një lufte 6 vjeçare të opozitës, që beteja e saj ka të bëjë me interesin publik, dhe jo thjesht luftë për pushtet.
“Opozita konsiderohet jo thjesht një denoncuese, por një partnere e denjë për t’a çuar vendin përpara”, tha Basha referuar raporteve me ndërkombëtarët.
Basha tha se brenda këtij muaji do të udhëtojë drejt Uashingtonit në takime të nivelit të lartë politik.
“Nuk shkoj në Uashington për të bërë foto”, tha Basha.
Referuar fotos 80 mijë dollarëshe të Ramës me Obamën, Basha tha se sot po përballemi me shkelje të ligjit zgjedhor në SHBA.
