Opozita ka vendosur të shtyjë për në mesin e tetorit nisjen e protestave masive, ndërsa do të përgatisë dy platforma alternative për reformën zgjedhore dhe reformën në drejtësi.
Kryedemokrati Basha zhvilloi mbrëmjen e djeshme një takim me aleatët e tij për të koordinuar aksionin opozitar në ditët në vazhdim. Burime nga “Panorama” thone se kampi opozitar ka rënë dakord që të shtyjë protestat deri gjysmës së dytë të tetorit.
Ndryshim të planit mund të ketë vetëm në rast të publikimit të ndonjë skandali të radhës. Ndërkohë, gjatë kësaj kohe, Partia Demokratike dhe aleatët do të fokusohen te komunikimi me qytetarët dhe t’u tregojnë atyre se kanë një alternativë dhe një opsion tjetër qeverisës. Mësohet se Partia Demokratike ka gati dy platforma për të prezantuar. Njëra prej tyre lidhet me Reformën në Drejtësi, ligjin e dekriminalizimit, ndërsa tjetra lidhet me Reformën Zgjedhore.
Në një deklaratë, më herët, gjatë ditës së djeshme, kreu i selisë blu tha se Reforma Zgjedhore dhe reforma politike është prioritet për Partinë Demokratike. TAKIMI Takimi mes kryetarit të Partisë Demokratike dhe aleatëve nisi rreth orës 19:00 dhe zgjati rreth një orë. Mësohet se objekt diskutimi ka qenë Raporti i publikuar nga OSBE/ ODHIR për zgjedhjet lokale të 30 qershorit. Në përfundim të takimit, kryedemokrati Basha tha se opozita ka gati një platformë që do tregojë rrugën për tejkalimin e krizës politike dhe kthimin e shtetit në binarë.
“Jemi gati të ofrojmë edhe një propozim apo platformë kombëtare për hapat që duhet të kryhen për daljen e vendit nga kriza, sepse gjendja është kaq e rëndë dhe pasojat e kësaj gjendjeje janë kaq të tmerrshme mbi njerëzit, saqë largimi i Edi Ramës, një orë e më parë, nuk mjafton. Duhet të kemi hapa të vendosur transformues për vendin, ndryshime të thella politike, ndryshime të thella zgjedhore, reformë të thellë zgjedhore dhe ndryshime të thella sa i përket shtetit të së drejtës, ku t’i jepet fund pandëshkueshmërisë së politikanëve të lidhur me krimin, dhe të mos varrosen çështjet e rëndësishme”, u shpreh Basha.
Duke iu përgjigjur interesit të gazetarëve, Basha tha se situata politike ka ndryshuar që nga 16 shkurti i këtij viti, kur opozita zhvilloi protestën e parë dhe që pas dy ditësh dogji në grup mandatet e deputetëve.
“Nuk ka nevojë të ketë as shkollë politike, as shkollë gazetarie për të kuptuar që Shqipëria sot politikisht është krejtësisht ndryshe nga çfarë ishte para 16 shkurtit. Kjo për dy arsye: E para, sepse ne i dhamë fund fasadës së regjimit dhe treguam qartë para shqiptarëve, por edhe para faktorit ndërkombëtar, se këtu nuk ka më shtet të së drejtës, por ka një shtet personal, kriminal të Edi Ramës. Së dyti, sepse duke i dhënë fund fasadës së regjimit, duke i treguar shqiptarëve se ne jemi të gatshëm të ndërmarrim edhe sakrificën më të madhe që mund të ndërmarrë një faktor politik. Jemi gati që bashkë me njerëzit të sjellim një ndryshim që nuk do të jetë thjeshtë dhe vetëm largimi i Edi Ramës, por do të jetë një ndryshim i thellë, një transformim i thellë politik”, u shpreh Basha.
