Rreth 30% e efektivëve të Policisë së Shtetit mund të përfitojë pension shërbimi nëse ka mbushur 55 vjeç dhe zgjedh të largohet nga detyra.
Në konferencën për mediat ditën e djeshme kryeministri Rama njoftoi për një reformë në radhët e policisë së shtetit e cila do të synojë uljen e moshës mesatare të policëve.
“Do të aprovojmë një reformë për uljen e moshës mesatare për Policinë e Shtetit. Në polici nuk mund të ketë punonjës mbi 55 vjeç”, tha Rama.
Sipas kreut të sindikatës së Policisë së Shtetit, Sadedin Fishta, kjo reformë mund të prekë 30% të gjithë efektivëve të policisë, më konkretisht 360 individë.
“Informacionet që ka Drejtoria e Përgjithshme janë të tilla që mund të ketë më shumë se 30 për qind punonjës policie mbi moshën 55 vjeç. Por edhe nëse do jetë mbi 30 për qind gjithësesi do të fillojë dalja në pension e këtyre efektivëve mbi bazën e kërkesës individuale apo edhe nga ndryshimet që do bëhen për shkak edhe të vettingut”, deklaron Sadedin Fishta.
Neni 6 i projektligjit të dorëzuar në Kuvend parashikon se pensioni i shërbimit përfitohet kur plotëson 25 vite pune me gradë, por edhe ka mbushur moshën 55-vjeçare. Masa e pensionit të shërbimit është sa 65 për qind e pagës mesatare neto.
Kjo lëvizje padyshim që do të ndikonte në veprimtarinë e policisë së shtetit pasi një ikje e këtyre përmasave të efektivëve do të kërkonte zëvendësim të shpejtë për të mos krijuar boshllëqe në sigurinë e qytetarëve. Pritet që pjesë e policisë do të jenë ushtarakë të cilët do të përbëjnë strukturën “Enfast” e cila do të shërbejë për kapjen e personave të shpallur në kërkim.
