Ish-deputetja e Partisë Demokratike, Oriola Pampuri, shprehet se opozita do të vijojë aksion kundër qeverisjes Rama gjatë gjithë verës.
Sipas Pampurit, protestat lokale dhe kombëtare s’do të ndalen.“Do të ketë zhvillime të tjera, PD do jetë gjithë verës në aksion, do ketë dhe protesta, takime me qytetarët, protesta lokale. Besimi i ndërkombëtarëve te Rama ka rënë. Asnjë nuk mund ta pranojë një kryeministër që po ecën në kahun e kundërt të standardeve evropiane.”, është shprehur Pampuri në rubrikën “Opinion”.
Në lidhje sesi do të veprojë opozita me zgjedhjet e 30 qershorit pasi të ngrihet Gjykata Kushtetuese, ish-deputetja e PD shprehet kështu:
“Ka një dekret të Presidentit, që zgjedhjet të mbahen më 13 tetor. Nuk mund ta hedhësh poshtë dhe as të bësh asnjë hap kundër këtij dekreti. Vetëm Gjykata Kushtetuese do ta gjykojë, çdo hap i gabuar do të gjykohet nga kjo gjykatë. Sot jemi pa drejtësi dhe pa gjykata.”
Sa i takon vendimit të kryebashkiakëve të djathtë për të liruar ose jo zyrat, pasi ju mbaron mandati, ish-deputetja Pampuri ka deklaruar se do të vendosin qytetarët.
“Kryebashkiakët e majtë janë qesharakë, se nuk mund të jenë të tillë pa garë. Të djathtët kanë vendosur të mos lirojnë vendet e tyre në bashki me mbështetjen e qytetarëve”, ka theksuar Pampuri.
