Trajneri Skënder Gega foli pas fitimit të titullit kampion duke u shprehur i emocionuar.
“Ëndërr e kam pasur që në momentin që mora përsipër këtë rrugë të gjatë. S’kam qenë kurrë më krenar për këtë trofe. Ia dedikoj çdo njeriu që më ka mbështetur, Demit, Ramës, çunave. Me mijëra emra që mund të falenderoj, por jam i lumtur për këtë arritje.
Dua t’i jap meritë gjithë ekipit dhe klubit, tifozëve, gazetarëve, por edhe trajnerëve që janë treguar fair-play. Kur kam ardhur ka pasur paragjykime, do i falënderoja. Nga e keqja dhe shpirti i thartuar, ndjej keqardhje për ta.
Sot jemi kampionë, dhe falenderoj të gjithë që kanë besuar te unë dhe te ky klub. Nuk më besohet që jemi kampionë. Çdo minutë që kalon, do më pëlqejë më tepër për gjithë atë vuajtje dhe sakrificë, edhe për familjen që e kam pasur larg. (përlotet kur përmendet familja). Kam shumë miq dhe shokë që kanë ardhur. Meritë kanë çunat, por Gaz Demi më dha kurajë në çdo moment të vështirë.
Ky ekip për një vit, ka punuar me orë të tëra. Gjithsesi, një ekip ka një zot të parin, dhe Gaz Demi është përgjigjur për çdo gjë. Nuk ka qenë vështirësi për ta drejtuar këtë ekip. Nuk jemi takuar më shumë se 3 herë me Demin për të folur këtë vit. Nëse diçka nuk shkon mirë, e marr përsipër vetë, por bashkëpunimi ka qenë i ngushtë.
Një ditë në krye të Tiranës? Çdo njeri, kundërshtar apo kategoritë e njerëzve që janë rreth Partizanit, nëse paragjykojnë për diçka që mund të jetë bërë para shumë vitesh, nuk do ishte diçka e mirë. Nëse jemi bashkë, dhe respektojmë kundërshtarin, ndjekim rregullat e klubit dhe të trajnerit, do ia dalim. Për pyetjen e dytë, shumë e thjeshtë, jam pjesë e Partizanit. Jam rritur këtu. Kjo ishte ëndrra. Tirana dhe asnjë ekip nuk është armik. Jeta është e gjatë, unë do kontribuoja aty ku ndihem rehat. Tiranës i uroj suksese”, deklaroi Gega.
