Partia Socialiste do të garojë pesë deputetë të Grupit të saj Parlamentar për kryetarë bashkie dhe dy prefektë të sapoemëruar për dy bashki të mëdha.
Socialistët kërkojnë të marrin drejtimin e Bashkisë së Lezhës nga të djathtët me anë të deputetit Pjerin Ndreu, i cili ka kohë që po punon në zonë dhe është prezantuar edhe nga Kryeministri Rama. Një tjetër deputet do të duhet të lërë mandatin e tij për të kandiduar për zgjedhjet lokale. Nuri Belba do të kërkojë votat për Bashkinë e Përrenjasit.
Ndërsa pritet kandidimi i deputetit Rakip Suli për Kamzën. Dy deputetët të tjerë, Flamur Golemi dhe Ilir Xhangolli, pritet të dorëzojnë mandatin e deputetit për të garuar për Bashkinë e Gjirokastrës dhe të Pogradecit, por ende nuk ka pasur prezantim të tyre nga Kryeministri në kuadër të turit që ai po zhvillon në Shqipëri, “Bashkia që duam”.
Pas zgjedhjeve të 30 qershorit, në Parlament pritet të vijnë 5 deputetë të rinj nga PS-ja. Ndreu në Lezhë do të zëvendësohet nga Adriana Jaku, mandatin e Belbës në Elbasan do ta marrë Desantila Tahiraj, ndërsa kreu i FRESSH-it, Eljo Hysko, pritet të ulet në Kuvend në vend të Rakip Sulit. Deputeti më i ri i Pogradecit do të jetë Ardit Konomi, pasi do të zëvendësojë Xhangollin.
Ndërsa i pesti do të jetë Laert Duraj, në vend të Flamur Golemit. Në funksion të zgjedhjeve vendore, Kryeministri largoi dy prefektë ish-ushtarakë, që vetë i kishte vendosur gati dy vjet më parë, duke i zëvendësuar nga dy djem të rinj, të cilët vinin pas një eksperience të suksesshme në administratën publike.
Kryeministri Rama emëroi Valdrin Pjetrin prefekt të Qarkut Shkodër, duke e përgatitur për kandidat për të fituar Bashkinë e Shkodrës. Vetë Kryeministri Rama u shpreh i vendosur nga Shkodra se PS-ja do ta fitojë edhe këtë bashki. Po ashtu, kreu i qeverisë pak muaj më parë emëroi Gledian Llatjen prefekt të Qarkut Elbasan, për ta përgatitur atë për të fituar Bashkinë e Elbasanit, të drejtuar prej tri mandatesh nga Qazim Sejdini.
