Aleatët e Bashës, krerët e partive të vogla opozitare kanë dhënë detaje sot nga platforma e propozuar për zgjidhjen e krizës politiek në vend, duke kërkuar ndërmjetësimin e presidentit të vendit, si organizues i tryezës së dialogut.
Në një konferencë për mediat pasi kanë prezantuar platformën, ata kanë thënë se duhet të jetë një qeveri tranzitore ajo që do të caktojë datën e zgjedhjeve, ndërkohë që marrëveshja nuk duhet të jetë Basha-Rama, por për gjithë shqiptarët.
“Nuk duhet të jetë një marrëveshje Basha-Rama, por e politikës shqiptarë, por për një marrëveshje të qëndrueshme dhe jo vetëm për këto zgjedhje”- ka thënë kreu i PR-së, Fatmir Mediu.
Ndërkohë që kreu i PAA, Duka ka theksuar prerë se: Nuk hyjmë në zgjedhje, pasi i quajmë ato farsë, nuk hyjmë pa një qeveri kalimtare dhe tranzitore. Asnjë nuk është i detyruar të jetë në unison për cështje të veçanta, edhe ne kemi qëndrime tona, por ajo që na bashkon është se i quajmë zgjedhjet farë, dhe duam qeveri kalimtare.
Pyetur nga media, se a do të pranojë Basha të ulet në tryezë me Ramën, aleatët kanë dhënë këto përgjigje:
Mediu: Ne kemi folur, dhe i kërkojmë presidentit të vendit të organizojë tryezën, nuk mendoj se përcaktojmë ne kush është kryetari i PS, përfaqësuesit e forcave politike duhet të ulen së bashku për të gjetur një zgjidhje, dhe ky është qëndrimi ynë.
Duka: Opozita së bashku me Bashën kanë një kërkesë, të hyjmë në zgjedhje me qeveri tranzitore, nëse e pranon Rama këtë, të garantoj unë që ulet Basha me Ramën.
Ju doni lista të hapura, e keni mbështetjen e Bashës për këtë?
Dash Shehi: Ne nuk futemi se është djegur afati, u mbyll kjo punë, kemi firmosur një marrëveshje me PD, nuk e duam Ramën kryeministër, edhe kjo punë ka mbaruar. Janë djeg mandatet, edhe zgjedhjet, nuk pranojmë të futemi në zgjedhje. Secila nga partitë ka ide të ndryshme për kodin zgjedhor.
