Janë të paktën pesë qytetarë që deri më tani kanë mësuar se firmat e tyre janë falsifikuar dhe janë përdorur për regjistrimin e Partisë Bindja Demokratike, e drejtuar nga Astrit Patozi.
Sipas ‘News 24’, disa nga firmëtarët janë fiktivë. Një ndër ta, Dritan Agushi nga qyteti i Kavajës i kontaktuar nga ky televizion deklaroi se ishte vënë në dijeni nga familjarët që emri i tij ishte në listën e themeluesve. Ai thotë se ndodhet jashtë vendit dhe se firma e tij është falsifikuar, madje premton se do ta ndjekë ligjërisht çështjen.
Përveç Agushit, janë edhe 4 qytetarë që kanë firmosur ankim në gjykatë kundër Bindjes Demokratike. Zyber Molla, Shyqyri Proshka, Mehmet Sheme dhe Mirjan Krasniqi i kërkojnë gjykatës të kthejë mbrapsht si të paligjshëm vendimin për regjistrimin e Bindjes Demokratike dhe shprehin gatishmërinë e tyre të vendosin para gjykatës specifikimet e shkrimit të tyre për të verifikuar shkencërisht se firmat për rregjistrimin e Bindjes Demokratike janë falsifikuar.
