Detaje të reja janë zbuluar pas vrasjes së dyfishtë në Shkodër të vëllezërve Bilali. Njëri prej viktimave, Astrit Bilali, në momentin kur është qëlluar me armë nga autorët, ka nxjerrë një pistoletë që e mbante me vete.
Pasi është plagosur, fillimisht Astrit Bilali ka nxjerrë pistoletën dhe ka qëlluar disa herë, por e ka pasur të pamundur që të shënjestrojë autorët, kjo sepse ishte plagosur dhe ka shtënë në mënyrë instiktive.
Nga ana tjetër, Policia Vendore e Shkodrës ka shoqëruar të paktën 30 persona për ngjarjen e një dite më parë. Janë marrë në pyetje, por asnjë prej dëshmive nuk është e vlefshme për të çuar te zbulimi i autorëve. Ministri i Brendshëm, Sandër Lleshaj, që ishte në Shkodër ka kërkuar me ngulm që Policia të zbulojë këtë vrasje të dyfishtë në takimin për 4 orë me radhë, si dhe lidhjen me ngjarjet e kaluara kriminale të ndodhura në Shkodër.
VRASJA
Dëshmi nga vendi i ngjarjes tregojnë se Astrit Bilali ka qenë në një lokal të lagjes, nga ku është ngritur i qetë dhe pa shfaqur shenja nervozizmi, për të takuar te dera e shtëpisë së tij të vëllain, Brahimin. Sapo Astrit Bilali ka mbërritur dhe ka takuar vëllain, dy persona i janë afruar dhe kanë qëlluar me breshëri plumbash në drejtim të tyre, duke i lënë të vdekur në vend. Dyshohet se në kohën që Brahim Bilali po priste vëllain e tij te dera e shtëpisë, një mjet tip “Mercedes Benz” është ndalur aty në afërsi, duke pritur që dy vëllezërit të bëhen bashkë.
Sapo vëllezërit Bilali janë takuar me njëri-tjetrin, kanë vërshuar plumbat e automatikut, ndërsa dyshohet se është qëlluar edhe nga një armë tjetër. Policia dyshon se janë dy autorë që kanë qëlluar në drejtim të vëllezërve Bilali, të cilët kanë qenë të maskuar në mënyrë që askush të mos i identifikojë. Menjëherë pas vrasjes, autorët janë larguar me shpejtësi në drejtim të paditur, duke humbur kështu gjurmët.
MAKINA
Pak minuta pas vrasjes së dyfishtë dhe jo shumë larg nga vendi i ngjarjes, Policia konstatoi një makinë tip “Benz”, e cila ishte duke u djegur.
Pas lajmërimit të repartit të zjarrfikësve, që bëri të mundur shuarjen e flakëve, hetuesit filluan këqyrjen e mjetit. Referuar burimeve, thuhet se mjeti tip “Benz” me targë AA 369 RV nuk është djegur plotësisht, duke rritur shpresat se nga këqyrja dhe aktet e ekspertimit do të gjenden të dhëna me rëndësi, të cilat do të bëjnë të mundur zbardhjen e ngjarjes. Autoritetet kanë dyshime se targat e kësaj makine janë false dhe ajo mund të jetë e grabitur me qëllim kryerjen e krimit, por kjo mbetet të verifikohet nga hetimet.
ASTMER BILALI MERR NGUSHËLLIME NË “FACEBOOK”
Djali i Astrit Bilalit, Astmer Bilali, i cili ndodhet në burg sepse është arrestuar në kuadër të operacionit “Oaz” me grupin Bajri, ka reaguar në rrjetin social “Facebook” pas vrasjes së babait dhe xhaxhait të tij.
Astmer Bilali ka postuar disa lajme të ndryshme të portaleve, duke shkruar ‘lamtumirë kampionë’ për babain dhe xhaxhain e tij, të cilët kanë qenë sportistë në garat e hipizmit me kuaj. Astmer Bilali ka postuar mbrëmjen e 30 marsit në dy momente të ndryshme, ndërsa disa komentuesve u ka kthyer përgjigje duke i falënderuar për ngushëllimet ndaj dy familjarëve të tij.
Policia është e angazhuar për të zbardhur këtë ngjarje të rëndë. Policia Vendore e Shkodrës dyshohet se ka sekuestruar kamerat e sigurisë në zonat afër vendit të vrasjes, por sipas burimeve, kamerat e sigurisë nuk kanë funksionuar, duke bërë që të jetë e regjistruar lëvizja e autorëve me mjetin tip “Benz”.
REAGON ARQIPESHKVI ANGELO MASSAFRA
Arqipeshkvi i dioqezës Shkodër-Pult, Angelo Massafra, ka komentuar ngjarjet e fundit të ndodhura në Shkodër, vrasjen e Ferdinand Polisë dhe të dy vëllezërve Bilali. Arqipeshkvi, gjatë meshës së shenjtë për 200-vjetorin e lindjes së arbëreshit Andon Santori, solli historinë e një babai me dy djemtë e tij.
Njëri nga djemtë e braktis babain për shkak se ky i fundit nuk i jep pasuri. Pas braktisjes, djali merret me fenomene negative. Arqipeshkvi Massafra u shpreh se janë pikërisht këto fenomene negative, që çojnë me pas të rinjtë te droga apo veprime të tjera. Monsinjor Massafra bëri thirrje që askush të mos i bëjë keq tjetrit, si dhe të pranojmë gabimet tona. Ka nga ata, tha arqipeshkvi, që pranojnë t’i fusin plumbin kokës vetëm nga krenaria e tyre për të mos pranuar gabimin që kanë bërë./panorama
