Banorët e zonës se “Astirit” janë mbledhur pasditen e së shtunës në ditën e 21-të të protestës. Protesta e banorëve u mbështet edhe nga kryetari i PD-së, Lulzim Basha. Në një deklaratë për mediat, Basha tha se projekti për Unazën e Madhe të Tiranës është një aferë, ku sipas tij, një centimetër kushton 2 mijë euro ndërsa i bëri thirrje policisë të mos bëhet vegël e qeverisë.
“Ligjet garantojnë transparencë. Jemi para një afere. Jemi në mbështetje të tyre dhe të shtëpive të tyre. Edi Rama duhet t’i vejë gishtin kokës. Afera është e qartë, 40 milionë euro, 2 mijë euro për cm. Po vidhen shqiptarët nga PPP. Vjedh 40 mln euro për të mbushur thasët. Ky është projekt i agait të Surrelit. Jemi në krah të banorëve. Rama po keqpërdor policinë. Të mos bëhet vegël policia. Policët të mos dalin kundër ligjit” – tha Basha.
Për projektin e Unazës së Madhe parashikohet që të prishen 317 objekte, 163 prej të cilëve janë në proces legalizimi dhe do të skualifikohen dhe 123 janë me vërtetime pronësie.
