Kanë nisur sot zyrtarisht spastrimet tek Unaza e Re në Tiranë për t’i hapur sheshin, zgjerimit të rrugës. Lajmi bëhet i ditur nga OSHEE-ja, e cila njoftoi se ka zhvendosur këtë mëngjes shtyllat e ndriçimit rrugor, në kuadër të kantierit që po ngrihet në zbatim të projektit të rehabilitimit të segmentit Pallati me Shigjeta – Sheshi Shqiponja”.
OSHEE-ja e lëshoi deklaratën pasi banorët e kësaj zone që do t’u shemben shtëpitë dhe banesat dolën në protestë mëngjesin e sotëm pasi konstatuan heqjen e shtyllave dhe shkuljen e pemëve nga trotuari.
OSHEE: “Duke marrë shkas nga pretendimet e shfaqura në media nga disa banorë të zonës së Astirit për ndërprerje energjie, sqarojmë se nuk ka patur asnjë ndërprerje energjie për asnjë objekt në këtë zonë dhe furnizimi vazhdon normalisht. Ajo ç’ka ka ndodhur mëngjesin e sotëm është zhvendosja e shtyllave të ndriçimit publik rrugor, në kuadër të kantierit që po ngrihet në zbatim të projektit të rehabilitimit të segmentit Pallati me Shigjeta – Sheshi Shqiponja”
