Shpërthimi i Emulacionit Rilindas

Nga Elona CASLLI

Kohët e fundit nuk kemi veçse një shpërthim të virusit në Shqipëri, por kemi edhe një shpërthim të tabelave të emulacionit, që përdoreshin dikur në diktaturën komuniste për të shfaqur punëtorët e dalluar në vend.

Kjo mendësi e kalbur komuniste, synon që çdo profesioni t’i japë një fytyrë të caktuar.

Shpërthimin e emulacionit e gjejmë rëndom në profilin e Edi Ramës, Ogerta Manasterliut dhe Erion Veliajt nëpër rrjete sociale.

Edi Rama, harron se mjekësia në Shqipëri, nuk mund të përfaqësohet me një fytyrë të vetme, për faktin e thjeshtë se në Shqipëri ka kudo mjekë që përballen me sfida të vështira dhe i kapërcejnë këto të fundit, pa foto në Facebook, pa deklarata para kamerave dhe pa zhurmë televizive.

E në respekt të stafit mjekësor që e kryen detyrën e tij pa bujë në këto kushte të vështira, nuk duhet të shpërthejë emulacioni rilindas, por mirënjohja dhe falenderimi duhet të jetë i përgjithësuar dhe jo i personalizuar, pasi nuk dëshmon gjë tjetër veçse praninë e ” Të dalluarve të Partisë”.

Ogerta Manasterliu, duhet të kuptojë se infermieria në këtë vend, nuk ka një fytyrë të vetme. Ka mijëra fytyra që nuk i njeh kush dhe nuk shfaqen askund. Ndaj Ogerta, të na e kursejë Tabelën e Nderit të Partisë me statuse të personalizuara për një individ të caktuar.

Erion Veliaj, nga ana tjetër krijon këndin e emulacionit për bojaxhinjtë e bashkisë dhe në atë kënd var një individ që sipas Veliajt e kryen punën shumë mirë.

Këndi i emulacionit është primitiv, është rrëqethës dhe i neveritshëm.

Nuk ka nevojë të pohoni se kush janë të Dalluarit e Rilindjes. Dallohen edhe pa i dalluar ju, në Këndin e Emulacionit.

Dallohen nga gjuha që flasin dhe nga qëndrimet që mbajnë.

Post Scriptum- Nuk ju ndahet shpirti nga Emulacioni Socialist.