Pfizer, vaksina efikase te të moshuarit

Tjetër lajm i mirë për vaksinat kundër koronavirusit. Ajo e prodhuar nga Pfizer dhe BioNTech rezulton 94% efikase te personat mbi 65 vjeç. Gjithashtu vaksina kineze e SinoVac rezultoi efikase dhe e sigurtë. Paralel me lajmet për vaksinën, OBSh-ja njoftoi për rënien e rasteve të reja në Europë, hera e parë që një gjë e tillë ndodh në tre muaj. 

Vaksina kundër koronavirsuit e zhvilluar nga bashkimi i firmave Pfizer dhe BioNTech rezulton 94% efikase për personat mbi 65 vjeç. Të dhënat e tjera të publikuara për fazën e tretë të provave klinike, tregon se vaksina funksionin në mënyrë të njëtrajtshme për të gjitha moshat, racat dhe etnitë.

Dy firmat thanë tani se do të aplikojnë për autorizim emergjent në Shtetet e Bashkuara. Gjetjet e fazës së tretë janë bazuar pas testimit të mbi 41 mijë vetëve në mbarë botën.

Javën e kaluar, Pfizer dhe BioNTech publikuan të dhënat paraprake të vaksinës që rezultoi mbi 90% efikase kundër Covid-19 dhe nuk paraqet shqetësime sigurie. Kjo u pasua nga lajmi për vaksinën e firmës tjetër amerikane Moderna, që sipas të dhënave rezulton se është 95% efikase.

Shkencëtarët thonë se lajmet e fundit për efikasitetin e vaksinave janë tepër inkurajuese dhe sigurojnë një zgjidhje të qëndrueshme.

“Të kalosh nga identifikimi i virusit tek prodhimi i disa vaksinave, tregon se shkenca ka hedhur një hap madhor para,” tha Prof Trudie Lang nga Universiteti i Oxfordit.

Lajme pozitive erdhën edhe për vaksinën e firmës kineze SinoVac, por zyrtarë të saj nuk thanë sa për qind është ajo efikase. Ata u mjaftuan vetëm me një deklaratë që thekson mbrojtje të plotë dhe siguri të vaksinës.

Lajmet e mira për efikasitetin e vaksinave vijnë paralelisht me njoftimet e Organizatës Botërore të Shëndetësisë për rënien javën e kaluar të numrit të rasteve të reja me COVID-19 në Europë.

Një gjë e tillë ndodh për herë të parë në tre muaj, ndërsa në kahun tjetër numri i viktimave vazhdon të rritet. Europa, mbetet rajoni më i prekur i botës me të paktën 15 milionë të infektuar.