“Dhunë” në shtëpinë e Fishtës, shoqërohet ish-deputeti, mbahen larg trashëgimtarë e banorë

Përurimi i restaurimit të shtëpisë së Fishtës u përfshi nga debate dhe përplasje. Në ceremoni u ftuan vetëm një grup i ngushtë pjesëmarrësish, teksa tentative e ish deputetit Ndocaj u pasua me shoqërimin e tij në polici. Edhe trashëgimtarët e poetit të madh shprehen se nuk u lejuan në festë

Ajo që duhet të ishte ditë feste për banorët e Fishtës u shndërrua në shfaqje force e Policisë së Shtetit dhe një aktivitetet privat vetëm për disa të përzgjedhur.

Përurimi i restaurimit  të shtëpisë së poetit mbarëkombëtar At Gjergj Fishta u parapri nga incidente.

Ish-deputeti Eduart Ndocaj u shoqërua me forcë në Polici, ndërsa banorët e zonës ku jetoi poeti nuk u lejuan të jenë pjesë e aktivitetit!

Përmes pamjeve që i transmetoi direkt në rrjetet sociale, ish-ligjvënësi denoncoi se largimi i tij me forcë erdhi pas një komunikimi me kryebashkiakun e Lezhës, Pjerin Ndreu i cili i tha se nuk kishte ftesë për të qenë aty.

Veprimet e dhunshme u kryen në prezencë të  Shefit të rendit në Policinë e Lezhës  Agron Qullhaj i cili pak muaj më parë veproi dhunshëm edhe ndaj gazetarit të Ora News, Elvis Hila teksa ishte në detyrë.

Jashtë aktivitetit kishin mbetur edhe pasardhës të Fishtës.

Ndërsa e gjitha çka ndodhi në Fishtë ngjalli reagime mes banorëve.

Siç është bërë traditë në aktivitetet e Kryeministrit mediat nuk ishin të lejuara pasi ekskluzivitetin e kishte ERTV, ku dha dhe mesazhin për presidentin.