Nga Marinela ZIU
Drejtues, Zyra Juridike për Mbrojtjen e Administratës, Partia Demokratike e Shqipërisë.
Miliarda nga taksat e qytetarëve më të varfër të europës, ku 1 në 3 persona mezi mbush barkun me bukë sipas Bankës Botërore, shkojnë për paga militantësh në administratë, shpenzime luksi, qoka e koncesione për 5 duar.
Vetëm në 3 vitet e fundit, nëpërmjet 23 VKM-ve, janë punësuar në administratë 13,315 persona me kontrata të përkohshme pune, duke shpenzuar nga taksat tona plot 55 milionë euro.
Nga ana tjetër, pas reformës së dështuar territoriale që ndau shqipërinë si plaçkë lufte për qëllime elektorale, pavarësisht se “synonte” uljen e shpenzimeve të administratës, punësoi edhe 8,100 persona në qeverisje lokale, duke shtuar faturën e qokave për militantë edhe me 92 milionë euro të tjera.
Kujtoj këtu, edhe faturën 140 milion euro të vendimeve të gjykatave, pas spastrimit me një të rënë të lapsit të profesionistëve dhe zëvendësimin e tyre me militantë që nuk përmbushin as kriteret minimale të vendit të punës.
Pra, 287 milionë euro nga taksat tona kanë shkuar për paga militantësh e vendime gjykatash për largimin e padrejtë të profesionistëve, 3 miliardë euro për aferat korruptive të koncesioneve, 1,2 miliardë euro për lukse e plot miliarda të tjera shpërdorime e përfitime me prokurime publike, leje ndërtimi, qira pronash publike për 1 euro, investime strategjike, leje minerare e çdo kontratë tjetër publike, që përfitohet vetëm nga 5 miq të Kryeministrit…
Ndërkohë, sërisht si të fundit në europë, qytetarët shqiptarë përpëliten me 7 euro në muaj për person, ndihmë në kohë pandemie…
Nuk jemi të varfër, jemi të vjedhur!