Nga, Elona Caslli
Në Pritje të Shenjtorëve
Çdo ditë që kalon duket se na përball gjithnjë e më dendur me një pjesë teatrale absurdi, ku përballemi me ngjarje të padëgjuara më parë, me veprime të pakryera më parë dhe pambarimisht jemi në kërkim të Shenjtorëve.
Kush do të vijë pas rrëzimit hipotetik të Ramës, është pyetja që ka pushtuar gjithë vendin?!
Duket se pas Ramës kërkojmë që të vijnë Shenjtorët.
Këta shenjtorë duhet të zbresin nga qielli. Duhet të jenë të kulluar ashtu si uji i Valbonës.
Nuk dihet nga ç’vend do të vijnë. Do të jenë të përzgjedhurit e qiellit dhe krejt papritur gjithkush dhe gjithçka do të ketë vendin e merituar në këtë vend.
Të dehur nga ardhja e Shenjëtorëve kemi bërë pakt me një Kryeministër që bën “ show” me varfërinë, që i tall të skamurit duke u bërë xhiro me avion, që plaçkit sistematikisht këtë vend sikur të qe toka e hasmit, që shkel çdo ligj dhe çdo nen të Kushtetutës, ndonëse paradoksalisht flet 24 orë mbi 24 për të shenjtën Kushtetutë , që na ftoi në zgjedhje edhe pse nuk kishim kë të zgjidhnim, që na kërcënon ditën për diell me heqjen e lirisë dhe që i nxjerr gjuhën kombit , si për t’i thënë se – Shenjtorët që prisni nuk do të vijnë kurrë dhe unë do të mbetem këtu.
Dhe Shenjtorët nuk do të vijnë, sepse kurrë nuk kanë shkuar gjëkundi.
Është e dhimbshme ta humbësh iluzionin e Shenjtorëve ,por është akoma më e dhimbshme të mbetesh në pritjen e pafundme të tyre.
Akti më i dhimbshëm në jetë është pritja.
Nuk duhet të harrojmë që Kombi ka rënë në këto dilema rrënqethëse:
Do ta nxjerrë apo nuk do ta nxjerrë gjuhën jashtë Kryeminstri i vendit?
Do të miratohen apo jo ligje që shkelin mbi Kushtetutën?
Ka vrarë apo ka përdhunuar Deputeti?
Do të rrethohet ose jo Teatri me policë?
Dhe rënia tek këto dilema therëse na bën të lëvizim nga skaji fundit i së keqes tek skaji i fundit i së mirës a thua se është një udhëtim që kryhet me tren duke u zhvendosur nga një qytet tek tjetri.
Përkundrazi është një proces i gjatë dhe i lodhshëm, i cili kërkon mbi të gjitha pjesëmarrjen.
Ndaj le ta lëmë mënjanë ëndrrën e Shenjtorëve dhe të zbresim tek Mëkatarët e Përgjegjshëm.
Post Scriptum- Nëse sot je i heshtur nesër gdhihesh skllav në Diktaturë.