Në 1 Shtator, në 98-vjetorin e shpalljes së Shqipërisë Mbretëri, kreu i Partisë së Lëvizjes së Legalitetit, Shpëtim Axhami, ka përcjellë një mesazh të fortë politik, duke e cilësuar Monarkinë Kushtetuese si një alternativë që, sipas tij, Shqipëria e meriton edhe sot.
Në urimin e tij për Ditën e Mbretërisë Shqiptare, Axhami rikthen në vëmendje 1 Shtatorin e vitit 1928, kur Shqipëria u shpall Mbretëri dhe Ahmet Zogu u shpall Mbret i Shqiptarëve.
Sipas kreut të PLL-së, kjo datë nuk përfaqëson vetëm një kapitull të historisë, por simbolizon rendin, institucionet, stabilitetin dhe unitetin kombëtar.
Axhami vlerëson periudhën 1928–1939 si një përpjekje për ndërtimin dhe konsolidimin e institucioneve të një shteti modern, ndërsa thekson se për legalistët Mbretëria Shqiptare nuk është thjesht nostalgji historike.
“Monarkia Kushtetuese, me Leka Zogu II Mbret i Shqiptarëve, është forma më e përshtatshme e qeverisjes për shqiptarët”, shprehet Axhami, duke vendosur në qendër të mesazhit të tij interesin kombëtar, stabilitetin institucional dhe unitetin e vendit.
Por mesazhi i tij shkon edhe më tej. Në fund të urimit, kreu i PLL-së artikulon hapur synimin politik të legalistëve:
“Qoftë sa më e afërt Dita e Rikthimit të Monarkisë Shqiptare!”
Axhami e mbyll mesazhin me thirrjen: “Rroftë Kombi Shqiptar!”, duke e kthyer 1 Shtatorin jo vetëm në një përkujtim historik për legalistët, por edhe në një deklaratë të qartë për vizionin e tyre politik për të ardhmen e Shqipërisë.
Postimi i plotë i Shpëtim Axhamit:
“Urim me rastin e Ditës së Mbretërisë Shqiptare! 🇦🇱
Të dashur bashkëkombas kudo ku jeni dhe jetoni!
Sot shqiptarët përkujtojnë një nga datat më të rëndësishme të historisë sonë kombëtare, 1 Shtatorin 1928, ditën kur Shqipëria u shpall Mbretëri dhe Ahmet Zogu u shpall Mbret i Shqiptarëve.
Kjo ditë nuk është vetëm një përvjetor historik. Për të gjithë shqiptarët, ajo përfaqëson një vizion shtetëror të mbështetur mbi rendin, institucionet, stabilitetin, unitetin kombëtar në krijimin dhe vazhdimësinë e shtetit shqiptar.
Periudha 1928–1939 mbetet një dëshmi historike e përpjekjes për ndërtimin dhe konsolidimin e institucioneve të një shteti modern. Mbretëria shqiptare nuk është thjesht një kujtim i së kaluarës, por ajo është një alternativë serioze politike që, sipas bindjes sonë, meritohet dhe kërkohet më së tepërmi edhe sot.
Legalistët mbështetës të kauzës mbretërore, besojnë se Monarkia Kushtetuese, me Leka Zogu II Mbret i Shqiptarëve është forma më e përshtatshme e qeverisjes për shqiptarët, duke vendosur mbi interesat e ditës interesin kombëtar, stabilitetin institucional dhe unitetin e vendit.
Prandaj për ne legalistët 1 Shtatori nuk mbetet vetëm një ditë e lavdishme historike por, ajo mbetet ideal dhe besim për të ardhmen e vendit.
Gëzuar 98-vjetorin e Ditës së Mbretërisë Shqiptare!
Rroftë Kombi Shqiptar!
Qoftë sa më e afërt Dita e Rikthimit të Monarkisë Shqiptare! 🇦🇱👑”**
