Nga Denada Isa
Në jetë takojmë shumë njerëz: disa vijnë për pak, disa qëndrojnë gjatë, e disa lënë gjurmë të pashlyeshme në zemrën tonë. Por jo të gjithë e dinë vlerën që kemi. Ka nga ata që na shohin vetëm në sipërfaqe, pa kuptuar sa mirësi, përkushtim apo forcë fshihet brenda nesh. E megjithatë, janë disa njerëz që duhet të dinë vlerën tonë sepse janë ata që kemi zgjedhur t’i lejojmë pranë shpirtit tonë.
Njerëzit që duhet të ta dinë vlerën nuk janë ata që të duartrokasin kur fiton, por ata që të japin dorën kur bie. Ata që nuk të gjykojnë për një gabim, por të kujtojnë sa shumë ke bërë mirë. Ata që nuk të krahasojnë me askënd, sepse e dinë që secili ka dritën e vet.
Është e lehtë të duash dikë për atë që duket, por duhet zemër e madhe për ta dashur për atë që është. Prandaj, njerëzit që duhet të ta dinë vlerën janë ata që të njohin në heshtje, që ndjejnë kur je i lënduar, që besojnë në ty edhe kur ti vetë dyshon.
Në fund, jeta na mëson të mos kërkojmë që të gjithë të na kuptojnë. Mjafton t’i kemi afër ata pak njerëz që e dinë sa vlejmë sepse vlera jonë nuk matet me fjalë, por me zemrat që na kuptojnë pa i thënë asgjë.
