Kryeministri Rama, gjatë një takimi në Vlorë, premtoi premtoi që pacientët e huaj nga vendet e rajonit të vijnë të kurohen në Tiranë, ndërkohë që në QSUT mungojnë ilaçet dhe operacionet për të sëmurët shqiptarë.
Në mungesë të një programi, gjatë fjalës së tij, Rama nuk përmendi për asnjë moment pensionistët, të cilët prej 12 vjetësh nuk kanë përfituar asnjë rritje reale të pensioneve të tyre.
Ndërkohë që të sëmurët me kancer po vuajnë nga mungesa e medikamenteve dhe aparaturave dhe çdo ditë publikohet një tjetër lajm skandaloz për gjendjen e shërbimit të urgjencës, kryeministri Rama theksoi se shumë shpejt pacientët e huaj do të vijnë të kurohen në Shqipëri.
Ajo që ra në sy ishte fakti se Edi Rama shmangu me taktikë bisedën për rritjen e pensioneve për mbi 700 mijë pensionistë, të cilët prej 12 vjetësh nuk kanë përfituar asnjë rritje.
“Një nga objektivat tona, të mbështetur në punë të bëra, jo ëndrra, është që në këtë 5 vjeçar t’i japim vendit një mundësi të re, sa i përket shërbimit shëndetësor duke zgjeruar kapacitete tona për të bërë shërbime shëndetësore ekstra. Ta bëjmë QSUT një qendër ekselencën të shëndetësisë në rajon është e mundur dhe plani është shumë i qartë dhe partnerët janë të jashtëzakonshëm.
Duam të fillojmë ndërtimin e një spitali tjetër, të një niveli më të lartë, jemi duke punuar për këtë. Flas për spital publik, me një skemë partneritetit me një vend mik për të krijuar kushte që në dekadën e ardhshme askush të mos ketë asgjë që këtu nuk e merr dot që të shkojë në Turqi dhe Itali. Shqipëria të bëhet pikë referimi edhe për vendet e rajonit dhe së shpejti do t’i finalizojmë”, tha sot Rama.
