Deputeti i PD-së, Dashnor Sula, në seancën e sotme plenare ka marrë një fustan dhe ka komentuar akuzat që SPAK ka bërë ndaj bashkëshortes së kryebashkiakut Erion Veliaj, për blerje online mbi 800 mijë euro.
Duke mbajtur fustanin në dorë, teksa fliste në Foltoren e Kuvendit, Sulaj u shpreh se nuk ka për qëllim që të ndërhyjë në jetën e bashkëshorteve të askujt, por sipas tij, në këtë rast shqiptarët duhet ta dinë se çfarë ka ndodhur me paratë e tyre.
“Nuk jam marrë me problemet e bashkëshorteve të askujt këtu, pork jo ia vlen të diskutosh. Ta marrin vesh gjithë qytetarët shqiptarë se çfarë ka ndodhur me paratë e tyre, taksat e tyre dhe si shpërdorohen paratë e tyre. Ja ku kanë shkuar paratë e shqiptarëve. Unë e di që shumë zonja nga mazhoranca mund ta veshin një fustan të tillë që kushton 45 mijë lekë të vjetra dhe s’e kanë për turp. Por, ka zonja që konkurrojnë me koleget që të kenë vlera sa më të larta.
Këto gratë e këtyre, e duan 2000-3000 euro dhe shumë e shumë çmime të tjera të larta. SPAK-ut i kërkoj që të mos merret vetëm me fustanet e bashkëshortes së Veliajt, por edhe me 5D e shumë të tjera. S’kishim dëgjuar kurrë që taksat e qytetarëve të Tiranës, t’i përdor kryebashkiaku me bandën kriminale. Nuk ngopeni o njerëz, po ndaloni mo, lakuriq kemi ardhur, ashtu do ikim!”- u shpreh Sula.
