Shpëtim Axhami, kryetar i PLL
KQZ miratoi dje projektvendimin për ndarjen e mandateve në 12 qarqe, bazuar në lista të mbyllura.
Nga 140 mandate, sipas pritshmërive dhe rezultateve të zgjedhjeve të vitit 2021, 92 mandate do të përcaktohen nga kryetarët e dy partive kryesore, PD dhe PS, bazuar në listat e mbyllura që dorëzohen në KQZ. Ky është një sistem që përfaqëson një nga rastet më flagrante të diskriminimit elektoral në 35 vite pluralizëm.
Në Tiranë, për shembull, nëse një parti fiton 12 mandate nga 37, këto mandate shkojnë automatikisht tek kandidatët në listën e mbyllur, pa asnjë mundësi votimi preferencial. Ndërkohë, një kandidat i të njëjtës parti, që garon në listën e hapur dhe merr një numër të konsiderueshëm votash preferenciale, p.sh., 30 mijë vota, nuk fiton mandat deputeti.
Kjo është një goditje e rëndë ndaj vullnetit të qytetarëve dhe integritetit të procesit zgjedhor. Shqiptarët brenda dhe jashtë vendit, sidomos ata të diasporës që janë më të vështirë për t’u blerë apo intimidu, duhet të ndërgjegjësohen dhe të ndëshkojnë me votë ata që miratuan dhe mbështetën këtë Kod Zgjedhor të padrejtë.
