(Në përkujtim të patriotëve që vendosën për alfabetin shqip në Kongresin e Manastirit)
Ju i mbollët shkronjat si lule të vogla,
Ngjyer me të artën e diellit ilirik,
Që u rikthye sërish mbi këto troje,
Për të ndriçuar edhe një herë,
Kombin e lashtë të shqipeve,
Përhumbur skllavërisht në errësirën otomane.
Ju i mbollët shkronjat me dashurinë e prindit,
Dhe lutët zotin e shqiptarizmës t’i bekonte,
Që në një gjerdan rruazash t’i kthente,
Për të zbukuruar shpirtin e çdo shqiptari,
Në këtë tokë që duhej të rilindte,
Në djepin-emblemë të një alfabeti.
Ju i mbollët shkronjat që të çelnin si rreze,
Mbi majat e ashpra ku sytë hap Ballkani,
Duke përhapur anekënd aromë lirie…
-ENERTIN DHESKALI-
(22 Nëntor 2019)
