Kandidatja demokrate Kamala Harris humbi zgjedhjet presidenciale në SHBA përballë kandidatit republikan Donald Trump, ku ky i fundit shënoi një rikthim të jashtëzakonshëm, duke fituar si me vota elekorale, po ashtu edhe me votë popullore.
Ndërkohë Harris, e cila aktualisht mban postin e zëvendëspresidentes së SHBA, ka pranuar zyrtarisht humbjen dhe ka uruar presidentin e 47-të të Shteteve të Bashkuara, Donald Trump, për fitoren e tij.
CNN shkruan se Harris e ka telefonuar Trumpin për ta përgëzuar për fitoren, duke i shprehur urimet e saj dhe duke diskutuar rëndësinë e një kalimi paqësor të pushtetit dhe të një udhëheqësi që punon për të gjithë amerikanët.
Një burim i CNN tha se biseda ka pasur një ton konstruktiv dhe të qetë, ku zëvendëspresidentja theksoi domosdoshmërinë që çdo ndryshim pushteti të bëhet në mënyrë paqësore, siç kërkohet nga tradita demokratike e SHBA-ve.
Ndërkohë, sipas CNN, stafi i Harris fajëson presidentin aktual të SHBA-së Joe Biden për humbjen.
“Biden duhet të ndihet fajtor për këtë rezultat”, ka thënë një zyrtar i lartë i fushatës së Harris për CNN. Vendimi i demokratit për të qëndruar në garë, pavarësisht shqetësimit të shumë demokratëve, nuk i dha Harrisit zgjidhje tjetër, por veç “të zhvillonte një garë jashtëzakonisht të cunguar”.
