Secilit nga ne, për arsye nga më të ndryshmet i është dashur të endet spitaleve dhe të përballet me sistemin e shëndetësisë.
Përtej “zhurmës” për papërgjegjshmërinë e personelit, fatkeqësisht në shumë raste qytetarët kanë të drejtë, sot, dua të shkruaj për atë pjesën e shëndetshme që më ra të takoj në sistemin shëndetësor e që më mrekulloi e më bëri me shpresë se me të tillë profesionistë gjërat mund të ecin për mirë.
Një prej tyre është doktor Reitano Galica, për mua deri atë ditë emër pak i panjohur, por për shumë të tjerë i njohur si modeli i mjekut humanist e profesionist.
Me shumë maturi dhe me një profesionalizëm admirues, dr. Reitano trajtoi rastin tim me një kujdes të veçantë, duke u përkujdesur për ecurinë e ekzaniminit dhe për çdo gjë tjetër që lidhet me problematikën time shëndetësore. Këtë vlerësin e kishin të gjithë pacientët që vizitoheshin dhe trajtoheshin nga dr. Reitano.
E befasuar nga sjellja dhe përkushtimi i tij u mundova t’i shpreh disi mirënjohjen dhe falenderimet e mia dhe të familjes, ai mu përgjigj: asnjë falenderim për punën time! Për mua personalisht sistemi shëndetësor duhet të jetë i tillë: unë dhe gjithë kolegët e mi ta bëjmë punën tonë për secilin pacient që troket në dyert tona, sepse kjo është detyra jonë.
Ky është rrëfimi im për humanitetin dhe profesionalizmin e dr. Reitano Galica, modeli i mjekut të përkushtuar e dinjitoz.
E di që nuk është i vetmi, as “Mohikani i fundit” në sistemin tonë shëndetësor, madje mendoj se mjekët si ai janë shumicë, vetëm se, punën e tyre e kryejnë në heshtje, pa zhurmë e pa trumpetime, janë heronj të heshtur si rëndom janë heronjtë e vërtetë.
Ky ishte falenderimi im për doktor Reitanon.
Ai nuk e di për këtë postim, por meqë ai u tregua modest me përgjgjigjen e tij, mendova t’ia shpreh publikisht falënderimin tim.
Faleminderit doktor!
Faleminderit që na treguat modelin e mjekut profesionist e të përkushtuar.
