Ish-kryeministri Sali Berisha në një deklaratë për mediat është shprehur se kjo është një ditë e rëndë për liritë dhe të drejtat e qytetarëve shqiptarë.
Pas humbjes së thellë, ku për herë të parë në këto zgjedhje nuk arriti të fitonte as edhe Bashkinë e Shkodrës, Sali Berisha e konsideroi procesin si një farsë elektorale. Ndër të tjera, ish-kryeministri tha se zgjedhësit shqiptarë janë terrorizuar dhe në të gjithë vendin ka pasur blerjeve të votave.
“Makineria elektorale e narkoshtetit të parë dhe të vetëm në Europë, industria e tmerrshme e blerjes së votës, bota e krimit dhe oligarkisë dhunuan si kurrë më parë historinë e këtij vendi votën e shqiptarëve. Janë të panumura aktet veprimet që dëshmojnë se gjatë këtyre muajve narkoshteti zbatoi programin e asgjesimit të lirisë së votës të blerjes së saj dhe terrorizimit të zgjedhësve. Kjo është një ditë e vështirë një ditë e rëndë për liritë dhe të drejtat e qytetarëve shqiptarë, është nëj moment agonie për vlerat demokratike në vend. Unë jam këtu për të dënuar me forcën më të madhe dhe të hedhur poshtë këtë farsë elektorale e karakterizuar nga alfat tek omega, nga krimi shtetëror elektoral dhe ordiner.
Jam këtu gjithashtu për të bërë thirrje të gjithë përfaqësuesve të opozitës në komisione e numërimit të vazhdojnë me përkushtim detyrën e tyre, mbasi është në parimin dhe qëndrimin tonë të bëjmë gjithçka për mbrojtjen e votës së qytetarëve shqiptarë. Së fundi, dënoj me forcë dhunën e përdorur në Kurbin ndaj një Komisioneri për faktin e vetëm se duan me ccdo kusht të diktojë të ndryshojë rezultatin në këtë bashki si kanë bërë në shumicën e bashkive të vendit. Shpreh solidaritetin tim me komisonerin Ismail Ismaili dhe me të gjithë komisionerët e tjerë që përmbushën punën e tyre”, tha Berisha.
