Nga Erl KODRA
Ka disa shkaqe pse qeveria e Edi Ramës është drejt fundit, shkaqe të cilat nuk mund të shtyhen në kohë.
Së pari, vendi nuk po qeveriset, por po grabitet hapur. Në të vërtetë vendi është vjedhur përgjatë gjithë kohës, por vitet e fundit grabitja ka marrë përmasa të frikshme, të paimagjinueshme. Nëse vazhdohet kështu, kriza ekonomike do të bëhet e pamenaxhueshme. Bashkimi Europian dhe partnerët nuk do të financojnë edhe njëherë kaosin politik dhe social të Shqipërisë.
Së dyti, proceset e filluara vite më parë nuk ishin rastësi, as tekë e partnerve, por plan konkret dhe i detajuar për të larguar këtë klasë politike. Një vend anëtar i NATO-s dhe që nesër do të jetë anëtar i BE-së nuk mund të qeveriset bashkë me krimin e organizuar dhe disa individë të pasuruar përmes krimit dhe korrupsionit. Partnerët gjenden para disa fakteve, të cilat nuk mund të injorohen, dhe kanë vetëm dy alternativa:
– ose duhet të heqin dorë nga Shqipëria,
– ose të largojnë këtë klasë politike.
Të heqin dorë nga Shqipëria nuk është një opsion, jo për hatrin tonë, por për hatrin e tyre. Ne jemi aq të rëndësishëm në Ballkan, sa mund t’u prishim punë.
Së treti, partnerët tanë SHBA dhe BE bënë një luftë në interesin tonë, që në fakt ishte edhe interesi i tyre. E vetmja Luftë që NATO dhe SHBA kanë bërë në Europë që pas L2B është Lufta e Kosovës. Kështu që është e pamundur që ky investim mbi 25 vjeçarë të hidhet në kosh. Ballkani është porta e Europës, dhe këtë hapësirë nuk do ia dhurojnë as Rusisë, as Kinës. Prandaj partnerët nuk tërhiqen, por do ta reformojnë këtë hapësirë gjeografike dhe politike sipas interesit të tyre. Kush dyshon për këtë gjë, ose nuk merr vesh nga kjo botë, ose merr vesh, por ka qëllime dhe interesa të tjera. SHBA qenka e mirë për të çliruar Kosovën dhe shpallur pavarësinë e saj, por nuk qenka e mirë kur thotë se të korruptuarit do të largohen nga politika.
Së katërti, shpalljet non-grata nga Mbretëria e Bashkuar janë pjesë e planit që ka hyrë në një fazë tejet kritike. Ato do të intensifikohen në muajt në vazhdim, duke prekur kryesisht qeverisjen e Ramës. Duket se pastrimin final partnerët ia kanë besuar Mbretërisë së Bashkuar. Rrugë tjetër nuk ka, dhe Rama është pa alternativë.
Së pesti, është e pamundur dhe jo-produktive që të thuhet se do të largojmë këtë klasë politike, ndërkohë që goditet vetëm opozita. Kjo nuk bën sens dhe është kundërproduktive. Për më tepër kjo do të zhyste vendin në një spirale të frikshme kaosi të pakuptimtë dhe të paarsyeshëm. Hajduti në krye të qeverisë do të ndalet, dhe tani është koha më e përshtatshme. Provat janë sheshit, dhe goditjet kanë filluar, për t’u intensifikuar këtë vjeshtë.
Së fundi, Edi Rama dhe PS do të zhbëhet, njësoj siç zhbëhet një bandë, sepse janë sjellur si bandë. Gjysmagjelat e PS që janë përkundur gjithë këto vite mes hajdutërisë dhe krimit të organizuar do shpërbëhen. Rrugë tjetër nuk ka.
