Alba dhe Eda, një çift lesbikesh, kanë rrëfyer historinë e tyre në emisionin “Rudina”, në TV Klan.
Ato kanë treguar se si e morën vendimin për t’u bërë nëna, paragjykimet dhe pengesat në Shqipëri.
Kjo është hera e parë në televizionet shqiptare, që dy nëna lesbike, kanë folur publikisht për familjen e tyre dhe për fëmijët që kanë sjellë në jetë.
Për momentin, Shqipëria nuk i njeh çiftet e së njëjtës gjini dhe organizatat LGBT+ kërkojnë njohje ligjore të këtyre marrëdhënieve, për të bërë të mundur edhe regjistrimin e fëmijëve.
Rudina Magjistari: Kur e more guximin, hapin për ta ndarë me familjen?
Alba Ahmetaj: Për ta ndarë me familjen shumë vite më vonë. Ka ndodhur kur kam qenë diku te 33 vjeç, kështu që kanë kaluar shumë vite. Kam qenë në një lidhje me Edën kur mora guximin sepse nuk mund t’i gënjeja sepse e ke parasysh, duhet të shkosh në shtëpi, t’iu thuash prindërve që “kjo është shoqja ime e ngushtë”, nuk mund t’iu thuash që “kjo është dashuria e jetës time” apo që do të krijosh familje, pavarësisht se atëherë krijimi i familjes me fëmijë, gjithmonë, ka qenë thjesht një ëndërr, por është e vështirë.
Rudina Magjistari: Dhe si reaguan ata? Nuk e pritën mirë.
Alba Ahmetaj: Prindërit e mi kanë këtë fiksimin me “çfarë do thotë bota?” dhe ajo na ka dëmtuar shumë sepse ka ndikuar në marrëdhënien tonë gjithmonë, fakti që nuk e pranuan dot marrëdhënien time me Edën asnjëherë. Një periudhë kohe nuk folëm, por më pas u rilidhëm, tani kemi marrëdhënie, por Eda nuk është pjesë e asaj marrëdhënieje dhe mua kjo gjë më vret shumë.
Rudina Magjistari: Pra nuk arrijnë dot ta pranojnë, nuk e bëjnë dot këtë hap?
Alba Ahmetaj: Jo, është shumë e vështirë
**
Alba Ahmetaj: Në fakt ne këtë gjë e kemi dashur (fëmijët) gati që në fillimet tona, por na dukej shumë e vështirë, gati e pamundur. Rezultoi e vështirë, por jo e pamundur. Në momentin që vendosëm se do e bënim i hymë studimeve. Patëm një incident të vogël në një nga këto klinikat private ku shkuam thjesht të informoheshim, Eda u prezantua se donte të ishte nënë e vetme dhe ndoshta doktori e kuptoi që ishim çift, pasi na tha se nuk mund ta bënim sepse ligji nuk e lejonte. Ai ishte një zhgënjim shumë i fortë. Madje nxori justifikimin se nëse ndodh diçka, familjet me gjini të njëjtë do të abuzojnë me këtë gjë.
Edlira Mara: Në atë kohë po punoja në një punë tjetër dhe fillova duke studiuar të gjitha spitalet private ku mund të kryeja “in vitro”. Shkuam atje bashkë me Albën, nuk u prezantuam si çift, thjesht morëm informacione mbi “in vitron”. Ka shkuar çdo gjë shumë mirë që nga dita e parë që kemi shkelur në atë spital. Procedura e “in vitros” ishte shumë normale për mua dhe pjesa e shtatzënisë ka shkuar shumë normal. U ndjemë shumë mirë të dyja në të gjithë procedurën e ‘in vitros’, procedurën e shtatzënisë dhe të lindjes së vajzave.
