Shumë po përflitet për rikthimin e Antoine Griezmann tek Atletico Madrid.
Trajneri i kampionëve të Spanjës, Diego Simeone flet rreth kësaj mundësie, teksa ndalet edhe te Rodrigo De Paul, mesfushori argjentinas që u transferuar nga Udinese për shumën e 35 milion eurove.
“Kam një raport të shkëlqyer me Griezmann, flas jashtë kontekstit sportiv. Fëmijët e mi luajnë me fëmijët e tij. Mbi të gjitha, e respektoj për atë që ka dhënë për Atletico Madrid. I uroj më të mirën te Barcelona, Antoine është një futbollist i jashtëzakonshëm.
Deri tani te Barcelona ka luajtur nën nivelin e tij, kurrë më parë nuk kishte shënuar më pak se 20 gola. Kjo është një statistikë e rëndësishme.
Uroj të rikthehet lojtari që njohim të gjithë, i uroj suksese me Barcelonën”, deklaron “El Cholo”, i cili kalon më pas te bashkatdhetari i tij.
“Unë jam një tifoz i Racing dhe e mbaj mend kur De Paul debutoi me atë ekip, e kam parë.
Në Itali është rritur tmerrësisht shumë, është përmirësuar shumë në aspektin taktik, ka luajtur në shumë pozicione dhe ka përmirësuar lojën me topin.
Mos të harrojmë që ka një goditje fantastike. Në qendër të mesit të fushës, kemi Koke, Herrera dhe Lemar që qarkullojnë topin, kështu që e kishim të nevojshme përfshirjen e një futbollisti i De Paul, i cili do të rrisë konkurrencën brenda grupit”, përfundoi Simeone.
