Pavarësisht faktit që Turqia ka tërhequr trupat ushtarake nga Krimea, gjë që pritej të ulte tensionet e saj me Shtetet e Bashkuara dhe Bashkimin Europian, një gjë e tillë mesa duket nuk është duke ndodhur. Ndërhyrja e shtetit rus në zgjedhjet e shteteve të ndryshme ka nisur atë që shihet si një betejë e kanalizuar në rrafshin e trupave diplomatike, duke qenë se tashmë dëbimi i zyrtarëve të ambasadave mes Rusisë dhe vendeve evropiane po vazhdojnë çdo ditë. Ditën e djeshme Rusia ka njoftuar se ka dëbuar dy diplomatë italianë.
Vendim i cili është marrë si shenjë hakmarrjeje ndaj dëbimit të dy diplomatëve rusë nga shteti italian në muajin mars. Muajin e kaluar, Italia dëboi dy diplomatë rusë pasi policia tha se ata kishin kapur një kapiten të marinës italiane duke i dorëzuar dokumente sekrete një zyrtari ushtarak rus në këmbim të një pagese. “Ambasadori italian në Moskë, Pasquale Terracniano, është ftuar në Ministrinë e Jashtme të Rusisë ku iu komunikua njoftimi se ndihmësi i atasheut të mbrojtjes dhe atasheut detar në ambasadën në Moskë shpallen persona non grata si përgjigje ndaj veprimeve jomiqësore të autoriteteve italiane kundër Ambasadës Ruse në Romë”, thuhet në njoftimin e ministrisë së Jashtme të Rusisë.
Shteti rus ka sqaruar se ka dhënë urdhrin që punonjësit e ambasadës italiane në Rusi duhet të largohen nga Rusia brenda 24 orësh. Vendimi i bërë i ditur ditën e djeshme nga qeveria Ruse, ministria e Jashtme italiane e quajti veprimin e Rusisë të pabazuar dhe të padrejtë. “Ne e konsiderojmë vendimin të pabazuar dhe të padrejtë sepse është në shenjë hakmarrje ndaj një mase legjitime të marrë nga autoritetet italiane në mbrojtje të sigurisë së tyre”, tha ministria e Jashtme italiane. Një ngjarje e ngjashme e lidhur me dëbimin e diplomatëve ka ndodhur edhe me Rumaninë. Ditën e djeshme shteti rumun njoftoi se ka marrë vendimin që të dëbojë një diplomat rus, duke u bërë kështu vendi i fundit evropian që e merr një masë të tillë pas mosmarrëveshjeve diplomatike midis Moskës dhe Çekisë mbi rolin e pretenduar të Rusisë në një shpërthim vdekjeprurës në 2014 në një depo çeke armësh.
“Aleksei Grichayev zëvendës-atashe ushtarak në Ambasadën Ruse në Bukuresht shpallet persona non grata për shkak të veprimtarive në kundërshtim me Konventën e Vjenës mbi marrëdhëniet diplomatike”, tha ministria e Jashtme e Rumanisë. Praga akuzon shërbimet sekrete ruse se qëndrojnë pas një shpërthimi që vrau dy persona në një depo të armëve në tetor 2014. Moska ka mohuar çdo përfshirje në shpërthimin e vitit 2014. Republika Çeke ka dëbuar 18 diplomatë rusë, ndërsa Moska u hakmor duke dëbuar 20 punonjës të Ambasadës Çeke. Shtatë vende të tjera të ish-Paktit të Varshavës në Evropën Qendrore dhe Lindore, të gjitha anëtare të Bashkimit Evropian dhe NATO-s, kanë dëbuar diplomatët rusë javët e fundit, duke nxitur masa reciproke nga Moska.
Fuqia e Rusisë në rënie
Shërbimet e inteligjencës britanike kanë njoftuar se fuqia e shtetit rus është në rënie. Shefi i shërbimit britanik të inteligjencës tha se veprimet e “pamatura” të Rusisë janë shqetësuese, por fuqia e Moskës është në rënie. Shefi i MI6, Richard Moore vuri në dukje tensionin e shtuar mbi Ukrainën dhe raportet e javës së kaluar se agjencia e inteligjencës ushtarake e Rusisë, GRU, shpërtheu një fabrikë të armëve çeke – si shkaqe shqetësimi.
“Kur merrni parasysh atë model të sjelljes së pamatur, natyrisht që atëherë shikoni se çfarë po ndodh rreth Ukrainës dhe natyrisht kjo na shqetëson”, citohet të ketë thënë Moore në një intervistë me Times Radio. Javën e kaluar, Moska njoftoi se do të tërheqë pothuajse 100,000 trupa nga kufiri i Ukrainës, duke de-përshkallëzuar tensionet mes shqetësimeve të një pushtimi të plotë. Moore tha se Britania e Madhe dhe Shtetet e Bashkuara kishin paralajmëruar presidentin rus Vladimir Putin për dëmet që mund të shkaktojë një pushtim. Por pavarësisht shqetësimeve, Moore tha se fuqia e Moskës po zbehet.
