Dy mjeke të Spitalit të Traumës, Xhuli Ngota dhe Arta Metalla kanë dhënë një mesazh sensibilizues teksa u kërkojnë qytetarëve që të qëndrojnë në shtëpi në këtë kohë që Covd-19 ka infektuar 42 persona në Shqipëri.
Me anë të një videoje të publikuar në profilin e Facebook, njëra nga mjeket, Ngota u shpjegon njerëzve se çfarë është shtrati kirurgjikal dhe tubi si dhe u kërkon të qëndrojnë në shtëpi në mënyrë që të shmangin intubimin. ajo gjithashtu shprehet se duartrokitjet e njerëzve u kanë dhënë forcë.
“Unë së bashku me kolegen time kemi vendosur që t’ju përcjellim një mesazh në një formë më praktike. Ju flasim nga salla kirurgjikale e Traumës dhe ju tregojmë disa gjëra. Ky është shtrati ku kryen operacionet dhe këtu përfundojnë të gjithë ata që kanë probleme të rënda.
Ky është një tub që shërben për t’u ardhur në ndihmë personave që nuk marrin dot frymë dhe intubohen. Ajo që dua t’ju them është: Qëndroni në shtëpi! Qëndroni në shtëpi që të mos përfundoni tek ky tubi.
Dje na dhatë shumë forcë me duartrokitjet tuaja, që të bëhemi më të përgjegjshëm. Një shprehje popullore thotë se njëra dorë ndihmon tjetrën, të dyja lajnë fytyrën. Njëra dorë jemi ne, tjetra jeni ju, ju lutem të bëjmë diçka që ta kalojmë sa më shpejt këtë situatë. Ju përshëndesim dhe Zoti qoftë me ju”, shprehet doktoresha në video.
