Shumë pak tituj i rezistojnë Lionel Messit. Vetëm Pele është një nga pak legjenda që mban akoma rekordin që argjentinasi nuk e ka arritur akoma. Numri 10-të i Barcelonës është 77 gola larg barazimit të rekordit që mbahet nga braziliani për numrin e golave të shënuar në një klub të vetëm.
Klubi katalanas humbi në “Camp Nou” në ndeshjen e së dielës kundër Real Betis me rezultatin 3-4, por dopieta e Messit nuk arriti të ndihmojë aspak që Barcelona të marrë tre pikë të plota, por vetëm të pranojë disfatën e dytë në 12 javë kampionat.
Megjithatë dygolësh i shënuar në atë takim ka ndikuar ndjeshëm te statistikat e tij personale. Sulmuesi katalanas qëndroi për disa ndeshje jashtë fushës, pasi u dëmtua në përballjen ndaj Sevillas, por nuk e harroi zanatin duke u rikthyer fuqishëm në fushë.
Me dy golat ndaj Betis, Messi kaloi rivalin e Bayern Munchen, Gerd Müller, i cili prej shumë kohësh mbante vendin e dytë në listan historike të golashënuesve kryesorë për një klub të vetëm. “Pleshti” arriti 566 gola të shënuar me fanellën e Barcelonës, në 15 sezone radhazi në Spanjë, ku debutoi 14 vjet më parë që në moshën 17-vjeçare, shkruan SP.
Ndërsa, vendi i dytë është disi larg nga maja e tabelës, e cila mbahet nga ish-futbollisti i Brazilit, që ka shënuar plot 643 gola në ngjyrat e Santos dhe kështu, talisman i Barcelonës ka ende 77 gola për të kapur rekordin e ri botëror.
