Nga Marinela Ziu
Eksperte, Departamenti i Antikorrupsionit, Aksesit Publik në Shërbime dhe Transparencës në Qeverisje, Partia Demokratike e Shqipërisë
Në prag të fushatës elektorale të 2021-shit, si në çdo fushatë, qeveria po përdor çdo mjet dhe mënyrë për blerje vote dhe ndryshim të vullnetit të qytetarëve.
Prej 7 vitesh, administrata publike trajtohet si plaçkë lufte për emërime politike, mbi të gjitha në periudha zgjedhore, duke e shndërruar administratën në një degë të partisë në pushtet.
Në dy vitet e fundit, janë shtuar në administratën qendrore dhe lokale 8,100 pozicione pune, duke sjellë një faturë prej 92 milionë eurosh në buxhetin e shtetit, pavarësisht se, me reformën territoriale u premtua se do të kishte ulje drastike të shpenzimeve të administratës, gjë që rezultoi një tjetër dështim me pasoja të rënda mbi buxhetin e shtetit.
Nga ana tjetër, për të njëjtën periudhë kohe, nëpërmjet 25 Vendimeve të Këshillit të Ministrave, sikurse vendimi i publikuar sot në Fletore Zyrtare, janë shtuar 13,395 pozicione me kontrata të përkohshme pune, të cilat, shtojnë faturën e shpenzimeve për administratën me 55 milionë euro.
Për ëndrën e “mandatit të tretë”, deri tani, janë shpenzuar nga taksat tona 147 milonë euro, vetëm për administratën, ndërkohë që mijëra qytetarë kaluan një dimër të ftohtë dhe po hyjnë në një tjetër dimër, ende nëpër çadra plasmasi dhe pa asnjë ndihmë nga qeveria…
